Bugun, 13-dekabr kuni AOKAda oʻtkazilgan brifingda Adliya vazirligi Axborot xizmati rahbari Shoxidaxon Yuldasheva vazirlik tomonidan inson huquqlarini himoya qilish yoʻnalishida amalga oshirilgan ishlarga toʻxtalib oʻtdi.

Taʼkidlangandek, Adliya vazirligi tomonidan 2024-yilda aholining zaif qatlamlari huquqi va manfaatlarini himoya qilish, ularning huquqiy savodxonligini oshirishga qaratilgan bir qator tadbirlar va tashabbuslar amalga oshirildi.

Xususan, avgustda oʻtkazilgan “Xotin-qizlarga huquqiy koʻmak” aksiyasi doirasida hududiy adliya organlari tomonidan joylarda 2 mingdan ortiq ommaviy sayyor qabullar tashkil etilib, ularda 37 ming nafarga yaqin fuqarolar qamrab olindi.

Ulardan 12 ming 700 nafaridan ortigʻiga birlamchi huquqiy yordam koʻrsatildi. Shuningdek, aksiya doirasida 3 ming 586 nafar xotin-qizlarning muammolari ijobiy hal etilib, 3 ming 332 nafar xotin-qizlarning real huquqiy himoyasi taʼminlanishiga erishilgan.

Masalan, Andijon viloyatining Paxtaobod va Oltinkoʻl tumanlarida homiladorlik va tugʻish taʼtiliga chiqqan taʼlim va tibbiyot tizimida ishlovchi 69 nafar xodimga jami 465 mln soʻmdan ortiq pul mablagʻlari toʻlab berilmaganligi aniqlangan. Adliya organlari aralashuvi bilan mablagʻlar toʻlab berilishi taʼminlangan.

Shuningdek, aksiya doirasida respublika boʻyicha xotin-qizlarning mehnat huquqlari himoya qilinganlik holati oʻrganildi. Aniqlangan qonunbuzilish holatlari boʻyicha adliya organlari tomonidan 785 ta taʼsir choralari qoʻllanilgan, shu jumladan 396 ta taqdimnoma, 71 ta ogohnoma, 210 ta daʼvo arizasi kiritilgan. Natijada jami 7 mlrd 811,5 mln soʻm undirib berilgan.

Yana bir misol —14 – 28-oktyabr kunlari “Ozodlikdan mahrum etish joylaridan ozod etilgan shaxslarning huquqlarini himoya qilish” huquqiy aksiyasi. Uning doirasida ozodlikdan mahrum etish joylaridan ozod etilgan shaxslar bilan manzilli ishlash, ularning muammolarini yaqindan oʻrganish maqsadida “Huquqiy targʻibot kuni” va “Adliya kuni” tadbirlari, ommaviy sayyor qabullar tashkil etildi.

Xususan, 748 nafar ozodlikdan mahrum etish joylaridan ozod qilingan shaxslarning muammolari ijobiy hal etilib, 605 nafar shaxslarning real huquqiy himoyasi taʼminlanishiga erishilgan.

Shuningdek, adliya organlari tomonidan “Ishga marhamat” monomarkazlari va boshqa tashkilotlar bilan hamkorlikda 333 ta “Boʻsh ish oʻrinlari” mehnat yarmarkalari tashkil etildi. Natijada 183 nafar shaxslarning bandligi taʼminlanib, 128 nafar shaxslar bepul kasbga tayyorlov kurslariga oʻqish uchun jalb qilindi.

Aksiya doirasida oʻtkazilgan oʻrganishlar va monitoringlar natijasida 600 ga yaqin, xususan, ijtimoiy toʻlovlar bilan bogʻliq 79 ta, mehnat masalalariga oid 171 ta, imtiyozlar bilan bogʻliq 9 ta va boshqa masalalar yuzasidan qonunbuzilish va kamchiliklarga yoʻl qoʻyilganlik holatlari aniqlangan.

Adliya organlari tomonidan tegishli tashkilotlarga 50 ta taqdimnoma, 31 ta daʼvo ariza, 51 ta ogohnoma va 10 dan ortiq maʼmuriy javobgarlikka tortish boʻyicha takliflar kiritildi. Natijada fuqarolarga 100 mlnga yaqin pul mablagʻlari undirib berilishi taʼminlandi, 40 ta qonunchilikka muvofiq boʻlmagan hujjatlar bekor qilindi.

Respublikaning barcha hududlarini qamrab olgan bunday tadbirlar doirasida ishtirokchilarga yuridik yordam olish imkoniyatlari va ularning huquqlarini himoya qilish mexanizmlari haqida maʼlumotlar taqdim etilmoqda, shuningdek, ularning muammolari va huquqiy masalalarini hal etishda amaliy yordam koʻrsatilmoqda.

Adliya vazirligi inson huquqlarini himoya qilish tizimini takomillashtirish boʻyicha ishlarini izchil davom ettiradi.

Adliya vazirligi
Axborot xizmati