O‘zbekiston Respublikasi Adliya vazirligi

Bugun, 4-dekabr kuni AOKAda yangi tahrirdagi Konstitutsiyani amalga oshirish doirasida qilingan ishlarga bagʻishlangan matbuot anjumani tashkil etildi.

Unda Oliy sud raisining birinchi oʻrinbosari Ikrom Muslimov, adliya vaziri oʻrinbosari Alisher Karimov, Ichki ishlar vazirligi akademiyasi boshligʻi oʻrinbosari Turgʻun Kuchkarov ishtirok etib, oʻz yoʻnalishlari boʻyicha jamoatchilikka axborot berdi.

Taʼkidlangandek, yangi tahrirdagi Konstitutsiya milliy davlatchilik taraqqiyotining tarixiy muhim bosqichida davlat va jamiyatni yanada rivojlantirishning ustuvor yoʻnalishlarini belgilab berdi. Konstitutsiyada mustahkamlangan ustuvor prinsiplarni roʻyobga chiqarish maqsadida barcha vazirlik va idoralar tomonidan tizimli ishlar amalga oshirilmoqda.

Xususan, Adliya vazirligi tomonidan Qonunchilik maʼlumotlari milliy bazasi xatlovdan oʻtkazilib, tegishli qonunchilik hujjatlari loyihalari ishlab chiqildi. Mazkur loyihalar natijasida qonunosti hujjatlarini Yangi tahrirdagi Konstitutsiyaga muvofiqlashtirishni nazarda tutuvchi Oʻzbekiston Respublikasi Prezidentining 2023-yil 7-noyabrdagi Farmoni (PF–188-son) hamda Vazirlar Mahkamasining 2023-yil 3-oktyabrdagi qarori (524-son) qabul qilindi.

Konstitutsiyaning 53-moddasidagi intellektual mulk qonun bilan muhofaza qilinishi haqidagi normani rivojlantirishga qaratilgan huquqiy mexanizmlarini yaratish maqsadida “Intellektual mulk obyektlarini huquqiy himoya qilish tizimi yanada takomillashtirilishi munosabati bilan Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida” Qonun qabul qilindi.

Ushbu qonunga koʻra, jismoniy va yuridik shaxslarning intellektual faoliyati natijasida yaratilgan mulkning daxlsizligini taʼminlash maqsadida intellektual mulk obyektlaridan qonunga xilof ravishda foydalanganlik uchun huquq egasining talabiga koʻra huquqbuzar tomonidan tovon toʻlash tartibi joriy etildi.

Shuningdek, yangi tahrirdagi Konstitutsiyani targʻibot qilish yoʻnalishida qator ishlar amalga oshirildi. Shu jumladan, targʻibot tadbirlari dasturi ishlab chiqilib, 2023-yil 20-mayda adliya vaziri tomonidan tasdiqlandi. Dasturga muvofiq bugungi kunga qadar 20 mingga yaqin huquqiy targʻibot tadbirlari oʻtkazildi. “Huquqiy axborot” Telegram kanalida #Konstitutsiyani_oʻrganamiz, mening konstitutsiyam xeshtegi ostida maʼlumotlar ulashilmoqda. Kurslar.huquqiyportal.uz portalida yangi tahrirdagi Konstitutsiya boʻyicha 4,5 soatga moʻljallangan bepul onlayn kurs yaratildi

“Yangi tahrirdagi Oʻzbekiston Respublikasi Konstitutsiyasini oʻrganamiz” mavzusida qisqa muddatli oʻquv kursi tashkil etildi. Advice.uz platformasida Yangi tahrirdagi Konstitutsiyaning asosiy mazmun-mohiyatini ochib berishga qaratilgan alohida boʻlim ochildi.

Ikki yildan buyon Toshkent shahri Sayilgoh koʻchasida “Konstitutsiya koʻchasi”da bir qator ommaviy tadbirlar oʻtkazilishi anʼanaga aylandi. Konstitutsiya koʻchasida Konstitutsiyaning yaratilishi, takomillashtirish bosqichlarini ifoda etadigan “Konstitutsiya tarixi” burchagi va fotokoʻrgazmasi, bolalar va yoshlarga Konstitutsiyada belgilangan normalarning mazmun-mohiyatini ochib beruvchi koʻrgazmali materiallar burchagi, Konstitutsiyani oʻrgatish boʻyicha zamonaviy metodika asosida tayyorlangan darsliklar, oʻquv qoʻllanmalari va maxsus adabiyotlar koʻrgazmasi tashkil etilishi yoʻlga qoʻyilgan.

Konstitutsiyaviy huquqlar boʻyicha sud va huquqni muhofaza qiluvchi organlar burchaklarini tashkil etilib, mazkur burchaklarda koʻrgazmali materiallar joylashtirildi.

Shuningdek, Konstitutsiyani bolalar tilida tushuntirishga bagʻishlangan multserial va komiks kitob yaratildi. Ushbu multfilmlar sunʼiy intellekt imkoniyatlari yordamida tayyorlangan boʻlib, bolalarga sodda va hayotiy misollar orqali Konstitutsiyamiz mazmun-mohiyati tushuntirilgan. Nogironligi boʻlgan bolalar uchun Konstitutsiya kitobining audio varianti yaratilib, barcha alohida taʼlim ehtiyojlari boʻlgan (koʻzi ojiz va zaif koʻruvchi) bolalar uchun ixtisoslashtirilgan maktab-internatlariga yetkazildi.

Adliya vazirligi

Axborot xizmati