Buxoro shahrida boʻlib oʻtgan “Eng namunali ekspert-kriminalistika jamoasi” hamda “Eng yaxshi ekspert-kriminalist” Respublika koʻrik-tanlovida hududiy saralash bosqichidan oʻtgan 16 ta jamoa va 32 nafar ekspert-kriminalistlar “eng yaxshi” eʼtirofga sazovor boʻlish uchun bellashdilar.

Koʻrik-tanlovning respublika bosqichi yuqori saviyada juda qizgʻin va koʻtarinki ruhda boʻlib oʻtdi. Bunda ekspertlarning ziyrakligi, zukkoligi, jinoyatlarni fosh etishdagi ilmiy-texnik salohiyati boʻyicha sinovlar qabul qilindi.

Koʻrik-tanlovni oʻtkazishdan asosiy maqsad soha xodimlarini xizmatga boʻlgan ishtiyoqini kuchaytirish, kasbiy tayyorgarlik sifatini oshirish, munosib ekspert-kriminalist xodimlari orasidan eng yaxshilarini aniqlash va ularni ijtimoiy qoʻllab quvvatlashdan iborat.

Tanlov ishtirokchilari belgilangan vazifalarni muvaffaqiyatli uddalab, bor bilim va kasbiy koʻnikma mahoratlarini namoyon etishdi.

Bellashuvning sinov natijalariga koʻra, IIV Akademiyasi Kriminalistik ekspertizalar kafedrasi jamoasi “Eng namunali ekspert-kriminalistika jamoasi” nominatsiyasi boʻyicha gʻolib deb topildi.

Ikkinchi oʻrinni Toshkent viloyati IIBB ekspert-kriminalistika markazi jamoasi hamda uchinchi oʻrinni Xorazm viloyati IIB ekspert-kriminalistika markazi egalladilar.

Shuningdek, “Eng yaxshi ekspert-kriminalist” nominatsiyasi boʻyicha Fargʻona viloyati Margʻilon shahar IIB ekspert-kriminalistika guruhi katta eksperti kapitan Toxirjon Ibroximov gʻolib deb topildi.

Ikkinchi oʻrinni Surxondaryo viloyati Termiz shahar IIB ekspert-kriminalistika guruhi katta eksperti katta leytenant Islom Norbekov va Sirdaryo viloyati IIB ekspert-kriminalistika markazi katta eksperti mayor Zafar Arziqulovlar egalladilar.

Samarqand viloyati IIB ekspert-kriminalistika markazi bosh eksperti podpolkovnik Azamat Abbosov, Andijon viloyati IIB ekspert-kriminalistika markazi katta eksperti kapitan Mirjalol Madaminov va Buxoro viloyati IIB ekspert-kriminalistika markazi bosh eksperti podpolkovnik Jahongir Sharipovlar uchinchi oʻrin sohiblari boʻlishdi.

Oʻtkazilgan koʻrik-tanlov, shaxsiy va jamoaviy birinchiliklar natijasida ekspert-kriminalistika sohasida ilmiy tadqiqot ishlarini rivojlantirishga, professional kasb mahoratiga ega boʻlgan isteʼdodli kriminalistlarni aniqlashga, istiqbolli kadrlar zaxirasini shakllantirishga hamda oʻz kasbiga boʻlgan sadoqat, gʻurur va iftixor kabi his-tuygʻularini kuchaytirishga xizmat qiladi.

IIV Ekspert-kriminalistika bosh markazi