Toshkent shahrida mamlakatimiz Ichki ishlar vazirining Rossiya Ichki ishlar vaziri bilan rasmiy uchrashuvi boʻlib oʻtdi
2024-06-25 17:00:00 / Yangiliklar
Oʻzbekiston Respublikasi Prezidenti Shavkat Mirziyoyev hamda Rossiya Federatsiyasi Prezidenti Vladimir Putin tomonidan joriy yilning 27-may kuni imzolangan Oʻzbekiston Respublikasi va Rossiya Federatsiyasi hamkorligining ustuvor yoʻnalishlarida hamkorlikni kengaytirish boʻyicha qoʻshma harakatlar rejasining ijrosini taʼminlash maqsadida Rossiya Federatsiyasi Ichki ishlar vaziri boshchiligidagi soha masʼullaridan iborat delegatsiyaning Oʻzbekiston Respublikasiga tashrifi amalga oshirildi.
Ikki davlat ichki ishlar organlari rahbarlari oʻrtasida boʻlib oʻtgan uchrashuvda taraflar uchun muhim boʻlgan masalalar keng muhokama qilindi, jumladan, Rossiya hududida boʻlib turgan Oʻzbekiston fuqarolarini, shuningdek Oʻzbekiston Respublikasidagi Rossiya fuqarolarining huquq va erkinliklarini taʼminlash, ular orasida huquqbuzarliklarni oldini olish va noqonuniy migratsiya holatlariga barham berish, jinoyatchilik, shu jumladan kiberjinoyatlar, firibgarlik, giyohvand moddalarning noqonuniy aylanishi hamda boshqa transmilliy uyushgan jinoyatlarga qarshi kurashish, shuningdek qidiruvdagi shaxslarni ushlashda soha xizmatlarining hamkorligiga eʼtibor qaratildi.
Shuningdek, tomonlar ichki ishlar organlari uchun kadrlar tayyorlash va ularning malakasini oshirish hamda ilmiy-tadqiqot yoʻnalishida aloqalarni mustahkamlash zarurligini taʼkidlab oʻtdilar.
Tadbir soʻngida rahbarlar kun tartibidagi masalalar boʻyicha bajarilishi lozim boʻlgan amaliy ishlar hamda istiqbolli vazifalar belgilangan bayonnomani imzoladilar.
Tadbir doirasida Poʻlat Bobojonov va Vladimir Kolokolsev Toshkent shahridagi “Gʻalaba bogʻi” yodgorlik majmuasiga tashrif buyurdilar.
Koʻp millatli xalqlarimiz koʻp asrlik umumiy tariximiz va uning yorqin sahifalari, jumladan, Ikkinchi jahon urushidagi Gʻalabani alohida hurmat-eʼtibor bilan yod etadilar.
Bu yerga tashrif davomida ikki davlat ichki ishlar vazirlari halok boʻlgan oʻzbek askarlarning xotirasini yodga oldilar va urush dastidan besh nafar oʻgʻlidan ayrilgan Zulfiya aya Zokirova xotirasiga oʻrnatilgan “Matonat madhiyasi” yodgorligi poyiga gulchambar qoʻydilar. Oʻzbekistonning urushdagi ishtiroki tarixiga bagʻishlangan Shon-sharaf muzeyining boy ekspozitsiyasi bilan tanishdilar.
Shuningdek, tashrif jarayonida, rossiyalik hamkorlar Ichki ishlar vazirligi Jamoat xavfsizligi departamentining Muvofiqlashtirish va monitoring qilish markazi faoliyati bilan tanishdilar.
Markaz jamoat xavfsizligi jarayonlarini qamrab olgan yagona axborot makoni hisoblanib, hududlardagi vaziyat va xodimlarning ish-harakati raqamli texnologiyalar orqali tahlil qilib boriladi. Hozirda, 10 mingdan ortiq profilaktika inspektorlarining faoliyatini 6 ta yoʻnalish boʻyicha nazorat qilish va baholash amalga oshirilmoqda.
Markazda “E-Jamoat xavfsizligi”, “E-Ijtimoiy vaziyat” kabi dasturlar, yoʻl harakati xavfsizligi, huquqbuzarliklar profilaktikasi va jamoat tartibini saqlash xizmatlarining yagona axborot tizimlari jamlangan, olti mingdan ziyod raqamli kuzatuv kameralari integratsiya qilingan. Shuningdek, markazda videoaloqa orqali profilaktika inspektorlari, yoʻl patrul, post patrul va probatsiya xodimlari uchun masofaviy oʻquv kurslarini oʻtkazish rejalashtirilgan.
Jarayonda, xorijiy mehmonlarga mamlakatimiz ichki ishlar organlari tomonidan sohada qoʻllanilayotgan transport vositalari, maxsus texnika hamda zamonaviy vosita va aslahalar namoyish etildi.
Mazkur tadbir ishchanlik va konstruktiv ruhda, doʻstlik, oʻzaro ishonch muhitida oʻtgani, sohalar oʻrtasidagi har tomonlama hamkorlikni yanada mustahkamlashda muhim ahamiyat kasb etadi.
Oʻzbekiston Respublikasi IIV