Namangan viloyati IIB boshligʻi polkovnik Shuxrat Aliyev tomonidan huquq-tartibot maskanlarining faoliyati muhokama qilindi
2024-06-13 16:20:00 / Yangiliklar
Joriy yilning aprel oyida Namangan shahar, Davlatobod va Yangi Namangan tumani hududlarida jinoyatchilikni jilovlash, huquqbuzarliklarning oldini olish, jamoat hamda yoʻl harakati xavfsizligini taʼminlash, aholi muammolari, shuningdek, murojaatlarini tezkorlik bilan qonuniy hal etishda yangicha tizim tashkil etilib, unga koʻra, ushbu shahar-tumanlar 15 ta kichik hududlarga boʻlinib, ularning har birida aholiga xizmat koʻrsatuvchi huquq-tartibot maskanlari tashkil etildi.
Polkovnik Shuxrat Aliyev huzurida oʻtkazilgan muhokama yigʻilishida boshqarma jamoat xavfsizligi xizmati rahbariyati, Namangan shahar, Davlatobod va Yangi Namangan tumani IIBlari huquqbuzarliklar profilaktikasi boʻlimlari boshliqlari, shuningdek, 15 ta huquq-tartibot maskani bosh inspektorlari ishtirok etib, huquq-tartibot maskanlarining ikki oylik ish faoliyati yuzasidan hisobotlari tinglandi hamda hududlarda ishni samarali tashkil etish boʻyicha tayyorlangan taqdimotlari namoyish etildi.
Yigʻilish davomida soʻnggi 2 oy ichida kichik hududlarda amalga oshirilgan ishlar, erishilgan natijalar, fuqarolar tomonidan kelib tushayotgan murojaatlar, jinoyatchilik va huquqbuzarliklar profilaktikasi ahvoli chuqur tahlil qilinib, huquq-tartibot maskanlarining faoliyati natijasida jinoyatlar salmogʻi sezilarli darajada kamayganligi alohida taʼkidlab oʻtildi. Shu bilan birga, maskanlarni toʻliq raqamlashtirish, u yerda soha xizmatlar faoliyatini yanada kengaytirish yuzasidan takliflar kiritish boʻyicha masʼul rahbarlarga aniq topshiriqlar berildi.
Namangan viloyati IIB Axborot xizmati