Rossiya Federatsiyasining Sankt-peterburg shahrida bo‘lib o‘tayotgan XII Peterburg Xalqaro forumi doirasida Adliya vaziri o‘rinbosari Alisher Karimov MDH Ijroiya qo‘mitasi Huquqiy departament rahbari Larisa Zaudalskaya va MDH ishtirokchi davlatlari adliya vazirlari Kengashi maʼsul kotibi Irina Selikoves bilan uchrashdi.

Uchrashuvda tomonlar MDH ishtirokchi davlatlari adliya vazirlari Kengashining XVIII yig‘ilishini joriy yilning oktyabr oyida O‘zbekistonda o‘tkazish masalalarini muhokama qilishdi.

Maʼlumot uchun: Adliya vazirlari Kengashi MDH ishtirokchi davlatlarning davlat rahbarlari Kengashi va davlat hukumatlari rahbarlari Kengashining organi hisoblanib, adliya vazirliklari bilan hamkorlik qilish, MDH ishtirokchi davlatlari qonunchiligini uyg‘unlashtirish, ishtirokchi-davlatlarning huquqiy siyosatini shakllantirish va amalga oshirish kabi va boshqa masalalar bilan shug‘ullanadi.

Adliya vaziri A.Karimov MDX Ijroiya qo‘mitasiga Kengash yig‘ilishini tashkil etish bilan bog‘liq jarayonlarga yaqindan ko‘mak berayotganligi uchun o‘z minnatdorchiligini bildirdi.

Shuningdek uchrashuvda O‘zbekistonda adliya sohasida amalga oshirilayotgan islohotlar, davlat xizmatlari va joylarda davlat organlariga yuridik xizmat ko‘rsatish bilan bog‘liq o‘zgarishlar to‘g‘risida so‘zlab berildi. Mazkur sohalarda MDH ishtirokchi davlatlari Adliya vazirliklari o‘rtasida doimiy tajriba almashish barcha uchun foydali ekanligi taʼkidlandi.

L.Zaudalskaya Kengash majlisining kun tartibiga kiritilgan masalalar, jumladan joylarda huquqiy xizmatlarni rivojlantirish, aholining huquqiy ongini oshirish, yoshlarga huquqiy taʼlim berish masalalarining dolzarbligini qayd etdi.

I.Selikoves o‘z navbatida O‘zbekiston Respublikasi Adliya vazirligi tomonidan Kengash majlisini o‘tkazishga tayyorgarlik ishlarini yuqori baholab, o‘zbek tomonidan taklif etilayotgan yangi tashabbuslar, jumladan o‘zaro huquqiy yordam ko‘rsatish jarayonlarni raqamlashtirish taklifini to‘liq qo‘llab quvvatladi.

Mazkur taklif amalga oshsa MDH ishtirokchi davlatlari aholisining o‘zaro huquqiy yordam olish jarayonlari soddalashishi, ortiqcha vaqt va resurslar sarfining oldi olinishiga erishilishi bildirildi.