Навбатдаги “ҳокимлик соати”да муҳим масалалар кўриб чиқилди
2025-05-06 11:35:00 / Мажлислар
Қашқадарё вилояти ҳокими Муротжон Азимов раҳбарлигида ўтказилган навбатдаги “ҳокимлик соати” йиғилишида давлат дастурлари ижросини таъминлаш, жамиятда барқарорликни мустаҳкамлаш ҳамда фуқаролар фаровонлигини юксалтиришга қаратилган қатор муҳим масалалар муҳокама этилди.
Хусусан, Президентимизнинг “2025 йилда Республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори ижроси юзасидан вилоятда амалга оширилаётган ишлар атрофлича таҳлил қилинди. Криминоген вазиятни барқарорлаштириш, ҳуқуқни муҳофаза қилиш органлари фаолиятини кучайтириш ва профилактика ишларини янада самарали ташкил этишга алоҳида эътибор қаратилди.
Йиғилишда, шунингдек, яшил энергетика сиёсатини амалга ошириш, хусусан, қуёш панеллари ўрнатилишини жадаллаштириш борасидаги вазифалар ижроси, "9 май – Хотира ва қадрлаш куни"га бағишланган тадбирларга тайёргарлик ҳолати ҳамда сафарбарлик чақирув резервини шакллантириш масалалари кенг муҳокама қилинди.
Шу билан бирга, эрта турмуш ва эрта никоҳнинг олдини олишга қаратилган тадбирлар, маҳаллалар фаолияти, инвестициявий лойиҳаларни жадаллаштириш, қишлоқ хўжалиги, қурилиш, ижтимоий соҳа ва бошқа устувор тармоқларда амалга оширилаётган ишлар таҳлил қилиниб, мавжуд камчиликларни бартараф этиш юзасидан аниқ вазифалар белгиланди.
Вилоят раҳбари йиғилишда сўз олган ҳар бир масъул раҳбарларга йўналишлар бўйича аниқ топшириқлар бериб, уларни белгиланган муддатларда, самарали ва натижага йўналтирилган ҳолда ижро этиш зарурлигини таъкидлади.