Қашқадарё вилояти ҳокимлиги

Ассалому алайкум, азиз ўқитувчи ва мураббийлар, қадрли устозлар!

Авваламбор, Сиз азизларни, таълим соҳасида меҳнат қилаётган барча устозларни, умумхалқ байрами – Ўқитувчи ва мураббийлар куни билан самимий табриклайман!

Инсон қайси касбни эгалламасин, ҳаётда қандай улуғ мартабага, улкан ютуқларга эришмасин, ўзига таълим-тарбия берган муаллимларини ҳеч қачон унутмайди, уларнинг олдида ўзини ҳамиша қарздор деб ҳис қилади.

Биламиз, азалдан “Устоз отангдай улуғ” деган ҳикматни қалбига сингдирган халқимизнинг бу соҳа вакилларига меҳр ва эҳтироми бошқача.

Янги Ўзбекистонни бунёд этиш, Учинчи Ренессансни яратиш орзуси билан яшаётган эканмиз, бу эзгу мақсадларимиз калити фақат таълим-тарбияда эканлигини барчамиз яхши англаймиз.

Шу боис кейинги йилларда мамлакатимизда ўқитувчи ва мураббийларнинг нуфузини оширишга алоҳида эътибор қаратилмоқда.

Янги таҳрирдаги Конституциямизда илк бор ўқитувчи мақоми алоҳида белгиланиб, таълим тизимини ривожлантириш давлатнинг бош вазифалари қаторига киритилди.

Жорий йилнинг 1 февраль куни  Ўзбекистон Республикасининг «Педагогнинг мақоми тўғрисида»ги Қонуни қабул қилинди.

Муҳтарам Президентимиз таъкидлаганидек: “Жамият ҳаётида ўқитувчининг ўрни ва таъсири ошса – мактабнинг обрўси ошади, илм-фан, таълим ва тарбия соҳасининг қадри кўтарилади. Муаллимнинг обрў-эътибори эса бу миллатнинг, бутун халқнинг обрў-эътиборидир”.

Давлатимиз раҳбарининг воҳамизга ўтган йилги ташрифлари давомида “2024 йил - Қашқадарёда таълим ва тиббиёт йили” деб эълон қилинган эди.

Бу йўналишда воҳамизда улкан ишлар амалга оширилмоқда.

Биргина таққосга эътибор қаратинг. 2017 йилда вилоятда 326 та боғча мавжуд бўлиб, қамров даражаси 13 фоиз эди. Жорий йилнинг ўзида 652 та янги боғча очилди, уларнинг умумий сони 4 минг 200 тадан ошди. Натижада қамров даражаси 65 фоизга етди.

Мактаблар моддий-техника базасини яхшилаш, уларни замонавий кўринишга келтириш бўйича қатор ишлар амалга оширилмоқда.

Хусусан, сўнгги 7 йилда 500 дан ортиқ мактабдаги янги қурилиш, реконструкция ҳисобидан 130 мингга яқин ўқувчи ўрни яратилди.

555 та мактабнинг мебел, парта, доскалари янгиланди, 778 та мактабга замонавий компьютер синфлари олиб берилди.

Яратилган имкониятлар сабабли 8-10 млн сўмдан маош оладиган ўқитувчилар 1 минг 400 нафардан ошган бўлса, 1 минг доллардан зиёд ойлик олаётган ўқитувчилар 214 нафарга етди.

Шунингдек, олис мактабларга бориб ишлаётган 645 нафар ўқитувчиларга 10 фоиздан 50 фоизгача устама тўланмоқда. Фурсатдан фойдаланиб, бундай залворли масъулиятни ўз зиммасига олган фидойи педагогларимизга алоҳида миннатдорлик билдирамиз.

Таълим сифатига берилаётган эътибор натижасида, жорий йил битирувчиларининг 40 фоизи олий таълим муассасаларига ўқишга кирди, олий таълимга кириш ўтган йилга нисбатан қарийиб 5 фоизга ошди.

Воҳамиздаги 58 та профессионал таълим муассасаларида фаолият кўрсатаётган 2 минг 424 нафар педагог ўз ишини замонавий талаблар асосида ташкил этиб,
40 мингдан ортиқ ёшларга замонавий касб-ҳунар сирларини ўргатиб келмоқда.

Бу борада ҳам бир қатор янги лойиҳалар амалга оширилмоқда. Жумладан, Шаҳрисабз шаҳри ва Ғузор туманида Германия билан ҳамкорликда ёшларга немис стандартлари асосида касбга ўргатиш ишлари бошлади.

“Авлодларингизга фақат бугуннинг эмас. келгуси замоннинг ҳам илмини ўргатинг”, - деб ёзган эди жадидларнинг улуғ намояндаси Маҳмудхўжа Беҳбудий. Дарҳақиқат, энг замонавий, келажакда ҳам асқатадиган, юрт тараққиётига хизмат қиладиган илмларни эгаллаган етук мутахассислар миллат истиқболини яратади.

Яқин-яқингача воҳамизда битта университет, битта институт, битта университет филиали фаолият юритган бўлса, бугунги кунда воҳамиздаги олий ўқув юртларининг сони 12 тага етди. Олийгоҳларимизда ўқиётган талабалар сони 110 минг нафардан ошди.

Бугун Қашқадарё ёшлари орасида тенгдошлари учун ҳақиқий ибрат намунасига айланган, илму заковати билан дунёни лол қолдираётганлари жуда кўп.  Айни пайтда дунёнинг “Google”, “Tesla” сингари энг нуфузли компанияларида воҳамиз ёшларининг ишлаётгани барчамизни ғурурлантиради.

Шунингдек, юрт байроғини жаҳон майдонларида баланд кўтараётган чемпионларимиз, фан олимпиадалари, маданият ва санъат соҳасида дунёнинг нуфузли кўрик-танлов ва фестиваллари ғолиблари етишиб чиқмоқда.

Бу каби оламшумул ютуқлар замирида, энг аввало устоз ва мураббийларнинг машақққатли меҳнати борлигини барчамиз чин дилдан эътироф этамиз ва уларга раҳмат айтамиз!

Қадрли ўқитувчи ва мураббийлар!

Давлатимиз раҳбари боғча тарбиячиси, мактаб муаллими, профессор-ўқитувчилар, илмий-ижодий зиёлиларимиз ва ҳурматли ота-оналаримизга янги Уйғониш даврининг беш таянч устуни, деб таъриф берган эдилар.

Дарҳақиқат, мана шу бешлик бир мушт бўлиб ҳаракат қилса, олдимизга қўйган катта марраларимизга албатта етамиз.

Барчангизни касб байрамингиз билан яна бир бор табриклаб, сиҳат-саломатлик, оилангизга файзу барака эзгу ишларингизда муваффақиятлар тилайман!

Ҳамиша шогирдларингиз камолини кўриб яшанг!

Эл-юрт олдидаги улуғвор мартабангиз ҳамиша баланд бўлсин!

Байрамингиз муборак бўлсин!