Пенсия жамғармаси томонидан 2026 йил I чорак якунлари бўйича сайёр ва шахсий қабуллар самарали ташкил этилди.

Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни талабларига мувофиқ, Пенсия жамғармаси ижро этувчи аппарати раҳбарияти томонидан фуқаролар ҳамда юридик шахслар вакилларини қабул қилиш тизимли равишда йўлга қўйилган. Шахсий қабуллар белгиланган кун ва соатларда тасдиқланган жадвал асосида мунтазам ўтказиб борилмоқда.

2026 йилнинг И чораги давомида Пенсия жамғармаси раҳбарияти томонидан тасдиқланган режа-график асосида ҳудудларда жами 6 маротаба сайёр қабуллар ташкил этилди. Ушбу қабулларнинг 3 таси ижро этувчи директор, 1 таси ижро этувчи директорнинг биринчи ўринбосари ҳамда 2 таси директор ўринбосари томонидан ўтказилди.

Сайёр қабулларда жами 348 нафар фуқаро иштирок этиб, уларнинг 72 нафари ўзларини қизиқтирган масалалар юзасидан мурожаат қилди. Мазкур мурожаатларнинг 30 таси ёки 41,7 % жойида ижобий ҳал этилиб, фуқароларга зарур ҳуқуқий тушунтиришлар берилди. Қолган 42 та мурожаат ёзма равишда қабул қилиниб, белгиланган тартибда кўриб чиқилди. Ушбу ёзма мурожаатларнинг 25 тасига ҳуқуқий жавоб бериш орқали ҳал этилган бўлса, 15 таси ижобий ҳал этилган ҳамда 2 таси эса тегишли ташкилотларга йўналтирилди.

Шунингдек, И чорак давомида раҳбарият томонидан жами 6 маротаба шахсий қабуллар ўтказилди. Уларнинг 2 таси видеоконференсалоқа орқали ташкил этилиб, фуқароларга масофадан туриб мурожаат қилиш имконияти яратилди. Ушбу қабуллар ҳам фуқаролар билан тўғридан-тўғри мулоқот ўрнатиш, уларнинг муаммоларини тезкор ва самарали ҳал этишда муҳим аҳамият касб этди.

«Инсон – жамият – давлат» тамойили асосида ташкил этилаётган бундай очиқ мулоқотлар фуқароларнинг давлат идораларига бўлган ишончини янада мустаҳкамлаш, уларнинг ижтимоий-иқтисодий муаммоларини ўз вақтида аниқлаш, чуқур таҳлил қилиш ва самарали ҳал этишда муҳим восита сифатида хизмат қилмоқда.

Айниқса, юзма-юз мулоқотлар орқали аҳоли дардини бевосита эшитиш, уларнинг таклиф ва ташаббусларини қўллаб-қувватлаш имконияти кенгайиб, давлат органлари фаолиятининг очиқлиги, шаффофлиги ва ҳисобдорлигини таъминлашда асосий омиллардан бирига айланмоқда.

2026 йилнинг ўтган даврида ташкил этилган шахсий ва сайёр қабуллар орқали пенсия тизимидаги долзарб масалалар юзасидан кўплаб мурожаатлар ижобий ечим топди. Бу эса давлат бошқаруви самарадорлигини ошириш, фуқаролар билан очиқ ва конструктив мулоқотни ривожлантириш йўлида муҳим қадам бўлди.

Келгусида ҳам Пенсия жамғармаси ижро этувчи аппарати раҳбар ходимлари томонидан ҳудудларда сайёр ва шахсий қабуллар тасдиқланган режа-график асосида давом эттирилади. Ушбу жараёнлар орқали фуқароларнинг мурожаатлари ўз вақтида кўриб чиқилиб, уларнинг қонуний манфаатларини таъминлашга алоҳида эътибор қаратилади.