Пенсия жамғармаси ижро этувчи аппарати раҳбарияти томонидан Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни талабларига мувофиқ жисмоний шахсларни ва юридик шахсларнинг вакилларини қабул қилиш белгиланган кун ва соатларда, қабул қилиш жадвалига мувофиқ ўтказиб борилмоқда.

Пенсия жамғармаси раҳбарияти томонидан жорий йилда белгиланган режаграфикка асосан ҳудудларда жами 73 маротаба сайёр шахсий қабуллар ўтказилган бўлиб, шундан ижро этувчи директори томонидан 23 маротаба, ижро этувчи директорнинг биринчи ўринбосари томонидан 25 маротаба ҳамда ижро этувчи директорнинг ўринбосари томонидан 25 маротаба ўтказилган.

Раҳбариятнинг ўтказилган сайёр шахсий қабулларида жами 4 103 нафар фуқаро қатнашган бўлиб, шулардан 759 нафари қизиқтирган саволлар билан мурожаат қилган. Мурожаат қилганларнинг 482 (63,5%) нафарининг мурожаатлари жойида ижобий ҳал этилган ҳамда ҳуқуқий маълумот берилган бўлиб, 277 нафарининг мурожаатлари ёзма қабул қилинган ва белгиланган тартибда жавоб хатлари берилган. Ёзма қабул қилинган мурожаатларнинг 226 тасига ҳуқуқий тушунтириш берилган, 28 таси ижобий ҳал этилган ҳамда 23 таси тушунтириш берилган ҳолда тегишли ташкилотларга йўналтирилган.

«Инсон – жамият – давлат» тамойили асосида ташкил этилган бундай очиқ мулоқотлар фуқароларни қониқтириш, уларнинг ишончини ошириш, муаммоларини ҳал этиш йўлида муҳим қадамдир. Халқ билан юзма-юз мулоқот қилиш – давлатнинг асосий вазифасидир.

Пенсия жамғармаси ижро этувчи аппаратининг раҳбар ходимлари томонидан ҳудудларда келгуси 2026 йилда ҳам белгиланган режа-графикка асосан сайёр шахсий қабуллар ўтказиб борилади.