Видеорепортаж: Жиззах шаҳрида Хотира ва қадрлаш куни арафасида қабристонлар ободонлаштирилмоқда
2025-05-08 13:20:00 / Янгиликлар
Жиззах шаҳрида Хотира ва қадрлаш кунини муносиб кутиб олиш, ўтганларнинг хотирасини эъзозлаш ҳамда ёш авлод онгида ватанпарварлик, тарихга ҳурмат туйғусини мустаҳкамлаш мақсадида шаҳар ҳудудидаги қабристонларда кенг қамровли ободонлаштириш ишлари олиб борилди.
Тадбирлар доирасида шаҳарнинг турли нуқталарда жойлашган бир неча йирик ва маҳаллий қабристонлар тартибга келтирилди. Жумладан, қабр-тошлар атрофи тозаланди, эски ёзувлар қайта тикланди, қабристонлар атрофига янги гуллар экилиб, ҳудуд бўйлаб кўкаламзорлаштириш ишлари амалга оширилди. Йўлакларга шағал ётқизилди, огоҳлантирувчи ва йўналтирувчи кўрсаткичлар ўрнатилди.
Бу ишларга маҳаллий ҳокимият идоралари, маҳалла фаоллари, "Нуроний", "Маҳалла", "Ёшлар иттифоқи" каби жамоат ташкилотлари ҳамда фаол кўнгилли фуқаролар жалб этилди.
Мазкур тадбирлар нафақат ҳудудларни обод қилиш, балки аҳолида, айниқса, ёшлар орасида миллий қадриятлар, ўтмишга ҳурмат, ватанга садоқат ва фидойиларга миннатдорлик туйғусини мустаҳкамлашга хизмат қилмоқда.
Жиззахликлар учун Хотира ва қадрлаш куни юракларда муқим жой олган муқаддас сана ҳисобланади.
Бу кун нафақат тарихга бўлган ҳурмат, балки миллат хотирасини сақлаш, фидокорона хизмат кўрсатган авлодларга бўлган чуқур эҳтиром ва миннатдорликнинг амалдаги ифодасидир.
Айни пайтда шаҳарда Хотира ва қадрлаш куни муносабати билан турли маданий-маърифий тадбирлар, ёдгорликларга гул қўйиш маросимлари, кекса авлод ва уруш қатнашчилари билан учрашувлар ҳам ўтказилиши режалаштирилган.