Жиззах вилояти ҳокимлиги

Ана шу устувор вазифалардан келиб чиқиб, Дўстлик туманида рақамлаштириш ва сунъий интеллект йўналишидаги ишларни жадаллаштиришга бағишланган муҳим учрашув бўлиб ўтди.

Унда туман ҳокими ўринбосарлари, тегишли соҳа мутахассислари ҳамда масъул раҳбарлар иштирок этиб, рақамли трансформацияни изчил амалга ошириш масалалари юзасидан атрофлича фикр алмашдилар.

Тадбирда Жиззах вилояти ҳокимининг рақамли технологиялар ва сунъий интеллект масалалари бўйича маслаҳатчиси Озод Бобомурадов қатнашиб, давлат бошқарувида сунъий интеллект имкониятларидан самарали фойдаланиш, жараёнларни автоматлаштириш ва бошқарув самарадорлигини ошириш бўйича муҳим жиҳатларга тўхталиб ўтди.

Хусусан, халқаро тажрибага таянган ҳолда, сунъий интеллект технологиялари жорий этилган мамлакатларда маъмурий харажатлар ўртача 20–30 фоизга қисқаргани қайд этилди. Бу эса рақамли ечимлар бошқарув тизимида тежамкорлик, тезкорлик ва шаффофликни таъминлашда муҳим восита эканини кўрсатади.

Шунингдек, мамлакатимизда амалга оширилаётган “Рақамли Ўзбекистон — 2030” стратегияси соҳада мустаҳкам ҳуқуқий ва институционал асос яратиб, давлат хизматларини рақамлаштириш, электрон платформаларни ривожлантириш ҳамда сунъий интеллект технологияларини амалиётга кенг жорий этиш учун кенг имкониятлар очиб бераётгани алоҳида таъкидланди.

Давра суҳбати давомида рақамли платформалар орқали аҳоли мурожаатларини таҳлил қилиш, ижтимоий эҳтиёжларни олдиндан прогнозлаш, бюджет маблағларидан фойдаланиш самарадорлигини оширишда сунъий интеллектнинг ўрни муҳим экани қайд этилди. Бу эса қарор қабул қилиш жараёнларида инсон омилни камайтириш, коррупция хавфини қисқартириш ва очиқликни таъминлашга хизмат қилиши таъкидланди.

Учрашув якунида рақамли трансформацияни тизимли йўлга қўйиш, соҳа учун малакали кадрлар тайёрлаш, инновацион ташаббусларни қўллаб-қувватлаш ҳамда замонавий технологияларни амалиётга жорий этиш бўйича аниқ таклиф ва вазифалар белгилаб олинди.

Мутахассислар фикрига кўра, мазкур изчил чора-тадбирлар Дўстлик туманида самарали, шаффоф ва замонавий давлат бошқаруви тизимини шакллантиришга хизмат қилиб, ҳудуднинг рақамли ривожланишига янги суръат бағишлайди.