Ўзбекистон Республикаси Ички ишлар вазирлиги

Юртимизга кириб келган баҳор фасли нишонаси «Наврўз» умумхалқ байрами муносабати билан анъанага кўра Ички ишлар вазири генерал-лейтенант Пўлат Бобожонов ҳамда соҳа масъуллари улуғ фахрийлар, нуронийлар ҳамда иккинчи жаҳон уруши ва фронт орти қатнашчилари ҳолидан хабар олишмоқда

Юртимизда турли байрам ва тантаналарда кекса авлод вакилларига ҳурмат кўрсатиш, нуроний ва фахрийлар ҳолидан хабар олиш яхши анъанага айланган. Сабаби, бугунги тинч ва осуда кунларимиз, фаровон турмушимиз уларнинг машаққатли меҳнати ва букилмас иродаси эвазига бунёд бўлган.

Айни шу эзгу мақсадларда Ички ишлар вазири генерал-лейтенант Пўлат Бобожонов ҳамда соҳа масъуллари томонидан пойтахтимизда умргузаронлик қилаётган улуғ фахрийлар, нуронийлар ҳамда иккинчи жаҳон уруши ва фронт орти қатнашчилари хонадонларига меҳмонга бориб, «Наврўз» байрами муносабати билан хабар олинди. Мутасаддилар фидойи кексаларга байрам совғалари улашилиб, уларнинг қувончларига шерик бўлишди.

Миробод тумани Мингўрик маҳалласида яшовчи Маргарита Филанович айни вақтда 87 ёшни қаршилаган. Иккинчи жаҳон уруши вақтида Ленинград қамалида қолган Маргарита ёшгина қизалоқ эди. Урушнинг машъум хотиралари унинг мурғак қалбига муҳрланган. Унинг ҳаётий тажрибаси ҳанузгача ёшларга катта ибрат бўлиб келмоқда. Филанович 200 дан ортиқ нашрлар, шу жумладан 20 га яқин монография муаллифи. Бундан ташқари, «Ўзбекистон тарихи» журнали муҳаррири ўринбосари, Олий аттестация комиссияси ҳузуридаги диссертациялар бўйича мувофиқлаштирувчи кенгаш аъзоси ҳамдир.

Яна бир фахриймиз Яккасарой тумани Муҳандислар маҳалласида истиқомат қилувчи Киреева Любов Семёновна бўлади. Айни ўспиринлик даври фашистларнинг концлагерида ўтган бу аёл, бугун тинч осуда юртда яшаётганидан бахтиёр. 46 йил меҳнат қилиб бугун нафақа гаштини сураётган Любов Семёновнанинг ҳаёт йўли чинакам ирода ва матонат намунаси.

Масъуллар ушбу маҳаллада яшовчи кекса фахрий Смолич Юрий Георгиевич хонадонида ҳам бўлиб, нуроний отахон билан суҳбатда бўлишди. Умрининг кўп қисмини ўзбек халқи билан ўтказган қаҳрамонимиз бугунги фаровон турмушимиз ҳамда кўклам баҳор гаштлари ҳақида илиқ фикрларни билдирди.

Ички ишлар вазирлигининг мутасаддилари ва масъуллар шунингдек, пойтахтимизнинг Шайхонтоҳур туманида истиқомат қилаётган Асқар Жўраев хонадонида ҳам бўлишди. Чинакам матонат ва жасорат соҳиби Асқар Жўраев иккинчи жаҳон урушининг айни суронли йилларида ватан озодлиги учун астойдил кураш олиб борган.

Масъуллар кекса фахрийлар билан учрашиш асносида уларнинг яшаш шароити, саломатлиги ҳамда муаммоларини ҳам ўрганишди. Бир сўз билан айтганда, баҳор айёмида кекса авлод вакилларига ҳурмат эҳтиром кўрсатилди.

Ушбу эзгу ишларнинг «Наврўз» байрами жараёнида амалга оширилиши ҳам бежиз эмас. Бу кунларда кўзлар қувончга, қалблар умидга тўлади, янги-янги марраларни забт этиш иштиёқи ошади. Юртимиздаги байрам шукуҳи ҳар бир хонадонга кириб боради.

Бу каби хайрли тадбирлар ҳудудлар кесимида ҳам давом эттирилмоқда.

ИИВ Ахборот хизмати