Ўзбекистон Республикаси Ички ишлар вазирлиги

Мажлисда, ишчи гуруҳнинг вилоятдаги ўрганиш якунларига кўра ҳудудлардаги мавжуд криминоген вазият, ҳуқуқбузарликларни барвақт олдини олиш, аҳолига хизмат кўрсатиш, мурожаатлар билан ишлаш, жамоат тартиби ҳамда йўл ҳаракати хавфсизлигини таъминлаш, шунингдек ходимларнинг ижро ҳамда хизмат интизомига риоя этиш масалалари танқидий муҳокама қилинди.

Жараёнда, хизмат фаолиятида юқори натижадорликка эришган, намунали хизмат фаолияти учун аҳоли ҳамда сафдошлари томонидан алоҳида эътироф этилган бир гуруҳ ходимлар муносиб тақдирландилар.

Ички ишлар вазирининг буйруғи билан Шаҳрисабз тумани ИИБ Эксперт-криминалистика гуруҳида 28 йил давомида бенуқсон хизмат кўрсатган катта эксперт майор Хусниддин Рустамов “подполковник” махсус унвони билан, Деҳқонобод тумани “Мустақиллик” маҳалласида намунали хизматни ташкил этган профилактика инспектори капитан Лутфулла Хамидов муддатидан олдин “майор” махсус унвони билан тақдирландилар, шунингдек ўн икки нафар раҳбар ходимлар “пул мукофоти” билан рағбатлантирилдилар.

Шу билан бирга, хизмат фаолиятида жиддий камчиликларга йўл қўйган соҳавий хизматлар ҳамда ҳудудий ИИБ раҳбарлари фаолиятига ҳуқуқий баҳо берилди.

Жумладан, Ички ишлар вазирининг буйруғи билан вилоят ИИБ Маънавий-маърифий ишлар ва кадрлар билан таъминлаш хизмати бошлиғининг ўринбосари, вилоят ИИБ Йўл ҳаракати хавфсизлиги хизмати бошлиғининг Маънавий-маърифий ишлар бўйича ўринбосари, Рўйхатдан ўтказиш ва имтиҳон олиш бўлими бошлиғи, Кўкдала ва Китоб туманлари ИИБ бошлиқлари, Косон ва Касби туманлари ИИБ бошлиқларининг биринчи ўринбосарлари, Муборак тумани ва Қарши шаҳри ИИБ Жамоат хавфсизлиги хизмати бўйича ўринбосарлари эгаллаб турган лавозимидан озод этилди.

Шунингдек, вилоят ИИБ бошлиғининг Жамоат хавфсизлиги бўйича ўринбосари, Тергов бошқармаси бошлиғи, Жамоат тартибини сақлаш бошқармаси бошлиғи, Йўл ҳаракати хавфсизлиги Қидирув-суриштирув бўлинмаси бошлиғи, Касби тумани ИИБ бошлиғи ва унинг Маънавий-маърифий ишлар бўйича ўринбосари, Қарши шаҳар, Косон ва Муборак тумани ИИБ бошлиқларига кескин интизомий жазолар қўлланилди.

Йиғилишда асосий эътибор ички ишлар органларининг раҳбарлари ва соҳавий хизмат йўналишларнинг масъулларини иш натижадорлиги учун шахсий жавобгарлигини оширишга, ходимлар томонидан хизмат интизоми ва қонунчилик талабларига қатъий риоя этишларини назорат тизимини такомиллаштиришга қаратилди.

Тадбир якунида мутасаддиларнинг ҳисоботлари ҳамда таклифлари тингланди, аниқланган камчиликларни бартараф этиш юзасидан аниқ муддатлар белгиланиб, вилоят ҳамда туман-шаҳар ички ишлар бўлинмаларининг моддий-техник таъминотини яхшилаш ҳамда ечимини кутаётган бошқа масалалар юзасидан истиқболли вазифалар режалаштирилди.