Ўзбекистон Республикаси Ички ишлар вазирлиги

Видеоселектор шаклида ташкил этилган тадбирда вилоят ҳокими Нормат Турсунов, соҳага оид вазирлик ва ҳамкор ташкилотларнинг масъуллари, сектор раҳбарлари ҳамда вилоят ҳудудидаги барча маҳаллаларнинг еттиликлари тўлиқ таркибда иштирок этдилар.

Таъкидланишича, республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш мақсадида Давлат раҳбарининг мазкур қарорида жорий йилда амалга оширилиши лозим бўлган аниқ вазифалар ўрин олган, уларнинг ижросини таъминлаш қатъий назорати белгиланган.

Жумладан, қарор талабларидан келиб чиқиб, Навоий вилоятида ҳуқуқбузарликлар профилактикаси бўйича ҳар бир туман ва шаҳар кесимида 330 та маҳаллага оид «Йўл хариталари» тасдиқланган бўлиб, шулардан криминоген вазияти оғир бўлган 54 та маҳаллалар туман-шаҳар сектор раҳбарларига, прокуратура, ички ишлар органлари ва Миллий гвардия қўриқлаш хизмати бошлиқларига номма-ном бириктирилган.

Шунингдек, республика ишчи гуруҳининг манзилли ўрганиш ишлари давомида хусусан, Ички ишлар вазирлиги Академияси раҳбари бошчилигидаги профессор-ўқитувчилар томонидан «қизил» тоифага киритилган 54 та маҳалладаги криминоген вазият таҳлил қилиниб, унда 239 дан ортиқ жиноятларнинг асл омиллари илмий-амалий жиҳатдан ўрганилди ва маҳаллалар кесимида 50 та янги «жиноят ўчоқлари» аниқланиб, ушбу ҳудудларни барқарорлаштириш бўйича йўл хариталарига киритиш учун таклифлар тақдим қилинди.

Вилоят маҳаллаларида криминоген вазиятни барқарорлаштириш ҳамда янгича ёндашувлар асосида ҳуқуқбузарликларнинг барвақт олдини олиш тизимини ташкил этиш бўйича, масалан Навоий, Зарафшон шаҳарлари, Кармана, Қизилтепа, Хатирчи, Учқудуқ туманларида “Хавфсиз ва рақамли маҳалла”, Кармана туманида “Намунали хавфсиз кўча”, Кармана туманида “Хавфсиз мактаб”, Навоий шаҳрида “Пробация ва профилактик ҳисобдаги шахсларни соғлом турмуш тарзига қайтариш”, Хатирчи ва Кармана туманларида “Хавфсиз бозор”, Навоий шаҳри ва Нурота туманида “Хавфсиз йўлак”, Навоий шаҳар, Кармана, Хатирчи, Навбаҳор, Нурота туманларида “Хавфсиз кўча”, Навоий ва Зарафшон шаҳарларида “Хотин-қизлар орасида жиноятчиликнинг барвақт олдини олиш” намуналарини яратиш режалаштирилди.

Ички ишлар вазирлиги томонидан профилактика кичик инспекторлари, миграцион профилактика бўлинмалари, маъмурий амалиёт гуруҳлари ва профилактика бош инспекторлари лавозимларини жорий қилиш ҳамда тегишли штат бирликларини шакллантириш вазифаси топширилди.

Тадбир давомида мутасадди раҳбарларнинг, маҳаллаларда ёшлар, аёллар ва ишсизлар томонидан, шунингдек, оила-турмуш муносабатлари доирасида содир этиладиган жиноятларни барвақт олдини олиш ҳамда ҳозирда кенг тус олган кибержиноятга қарши курашиш бўйича тарғибот ишларини кучайтириш борасидаги фикр-мулоҳазалари тингланди ва амалга оширилиши зарур бўлган масалалар муҳокама қилинди.

Тадбир сўнгида вилоят ҳокими томонидан қарор ижросини таъминлашга қаратилган чора-тадбирлар юзасидан аниқланган камчиликларни бартараф этиш борасида масъул раҳбарларга аниқ вазифалар юклатилиб, ижро муддатлари белгилаб берилди.

ИИВ Ахборот хизмати