Ўзбекистон Республикаси Ички ишлар вазирлиги

Дастлабки манзил вилоятнинг чекка ҳудуди ҳисобланган Ургут тумани бўлди. Унда ишчи гуруҳи туманнинг “Мерганча” маҳалласида жиноятчилик ва ҳуқуқбузарликларнинг олдини олиш бўйича амалга оширилаётган ишлар ва “маҳалла еттилиги” фаолияти, шунингдек тартибли меҳнат миграцияси бўйича тақдимот билан танишди. Маҳаллада иш услуби самарасиз ташкил этилгани, профилактика инспекторининг ишлари қониқарсиз эканлиги, шунинг учун маҳалла “қизил” тоифага тушиб қолганлиги танқид қилинди.

Шундан сўнг туман сектор раҳбарлари, ҳамкор ташкилотларнинг масъуллари, “Мерганча” “қизил” тоифадаги маҳалла еттилиги иштирокида йиғилиш ўтказилиб, унда мазкур қарорнинг мазмун-моҳияти иштирокчиларга етказилиб, улар томонидан амалга оширилган ишлар таҳлил этилди.

Таъкидланишича туман ҳокимининг “йўл харитаси” тасдиқланиб, криминоген вазият оғир маҳаллаларда илмий-амалий ёндашувлар асосида жойларга чиққан ҳолда мақсадли ўрганишларни ўтказиш орқали ҳуқуқбузарликларга сабаб бўлаётган асл омилларни аниқлаш ва барҳам бериш бўйича ташкилий-ҳуқуқий чоралар кўриш мақсадида 7 та криминоген вазияти оғир маҳаллаларга тегишли раҳбарлар бириктирилди. Жорий йилнинг 1-чорагида “Дўстлик” ва “Тўрткўл” маҳаллаларида Ҳуқуқ-тартибот масканлари қурилиши, тумандаги “қизил” тоифага тушган маҳаллаларга 235 та кузатув камералари ўрнатилиши белгиланди. Шунингдек, “Янги Ўзбекистон” массивида 90 дона юзни ва авторақамларни таниб олувчи видео кузатув мосламалари, тумандаги мавжуд бозорлар ҳудуди, 50 та мактаб, 25 та спорт майдончалари ҳам тўлиқ камералар билан таъминланади. 270 та хонадон, 28 та тадбиркорлик ва савдо шохобчалари Миллий гвардия томонидан қўриқловга олинади. “Янги Ўзбекистон” массивидаги кўп қаватли уйларнинг йўлаклари кириш эшикларига 10 та замонавий домофонлар ўрнатиш чораларини кўриш топшириғи масъуллар зиммасига юкланди.

1-чорак давомида туман ҳудудларида 28 та “Намунали хавфсиз кўча” ва 102 та “Намунали хавфсиз йўлак”ларни ташкил қилиш, видеокамералар ўрнатиш ҳамда вазиятни назорат қилиш борасида масъулларга қўшимча топшириқлар берилди.

Унда масъулларга ҳуқуқбузарликлар барвақт профилактикасини ташкил этиш бўйича намунавий тартиб яратиш ҳамда “Мерганча” маҳалласини намунавий масканга айлантириш лозимлиги ҳам таъкидланди.

Навбатдаги манзил Тойлоқ тумани “Чароғбон” маҳалласи бўлиб, туман сектор раҳбарлари иштирокида бу ерда ҳам жиноятчилик ва ҳуқуқбузарликларнинг олдини олиш бўйича амалга оширилаётган ишлар ва “маҳалла еттилиги” фаолияти, шунингдек ичкиликка ружу қўйган, гиёҳванд, руҳий касаллар ва бошқа ижтимоий кўмакка муҳтож шахсларга манзилли тиббий хизмат кўрсатиш бўйича тақдимот ўтказилди. Шунингдек, “Чароғбон” маҳалласи ҳудудидаги “Янги Ўзбекистон” массивида “намунали хавфсиз кўча”ни жорий этиш бўйича тақдимот ҳавола этилди.

Тадбирда масъулларга ҳуқуқбузарликларни барвақт профилактикасини “Йўл харитаси” асосида тўлиқ ижро этилишини таъминлаш ҳамда ижтимоий профилактика тизимини самарали йўлга қўйиш, янги иш ўринлари яратиб, фуқаролар, айниқса, ёшлар ва аёлларни бандлигини таъминлаш бўйича тегишли тавсия ва топшириқлар берилди.

Шунингдек, республика ишчи гуруҳи аъзолари кичик гуруҳларга бўлиниб, вилоятнинг барча шаҳар-туманларида қарорнинг мазмун-моҳиятини тушунтириш, ижросини таъминлаш чораларини кўрмоқда.