Юқоридаги белгиланган вазифаларнинг ижросини назорат қилиш ҳамда самарасини ошириш мақсадида ишчи гуруҳ томонидан Миробод тумани Нукус кўчасида жойлашган “Миробод туман газ” корхонаси, шу туман Мехржон кўчасида жойлашган “Туман электр тармоқлари” корхонаси, Мунис кўчасидаги “6-сонли Иссиқлик маркази” ҳамда Яшнобод тумани Иззат кўчасида жойлашган “7-сонли иссиқлик маркази” фаолиятлари ўрганилиб, аҳолини куз-қиш мавсумида энергия таъминоти (электр, табиий ва суюлтирилган газ, иссиқ сув) билан тўлиқ таъминлаш, авариявий ва бошқа нохуш ҳолатларни зудликда бартараф этиш чоралари билан танишилди.

Шу билан бирга, ҳозирги кунда модернизация қилинган ҳамда аҳолига юқори сифатли ва тезкор коммунал хизматларини кўрсатишга ихтисослашган Миробод тумани Зиёнур маҳалласига хизмат кўрсатувчи “Добус коммунал” бошқарув сервис компанияси ҳамда Яшнобод тумани Ахмад Яссавий маҳалласига хизмат кўрсатувчи “Юксалиш” бошқарув сервис компаниясининг фаолиятлари ўрганилди.

Ўрганишлар жараёнида электр энергияси, табиий ва суюлтирилган газ, кўмир ва иссиқ сув таъминоти барқарорлигини таъминлашга алоҳида эътибор қаратилди.

Шунингдек, ишчи гуруҳ томонидан об-ҳавонинг мураккаб шароитларида аҳолига ёнғин хавфсизлигига қаратилган ҳамда тез-тиббий ёрдам хизматини кўрсатилиши ва хавфсизлик чораларини тўлиқ таъминланишига қаратилган вазифаларини ўрганиш учун Миробод тумани Фавқулодда вазиятлар бошқармаси ҳамда Республика тез-тиббий ёрдам филиали 7-бўлими фаолияти ўрганилди. Жараёнда, хизматга жалб этилган шахсий таркиб ва бириктирилган куч ва воситаларнинг шайлиги, шунингдек уларнинг тезкор вазиятни барқарорлигини таъминлашга тайёргарлиги текширилиб, хизмат фаолиятини такомиллаштириш юзасидан аниқ вазифалар берилди.

Пойтахтимиз маҳаллаларида кўп қаватли уйлар, шахсий хонадонлар ва жамоат жойларида видеокузатув қамровини ошириш, криминоген вазиятни барқарорлигини таъминлаш, профилактика инспекторлари томонидан аҳоли муаммоларни ўрганиш ҳамда бартараф этиш бўйича “маҳалла еттилиги” билан яқиндан ҳамкорликни йўлга қўйиш бўйича кўрилаётган чора-тадбирлар Миробод тумани “Янги Қўйлиқ” маҳалла фуқаролар йиғини мисолида ўрганилди.

Тадбир давомида, эътибор, шунингдек шаҳар йўлларида хавфсиз ҳаракатланиш, пиёдалар айниқса болалар, ёшлар ва аёллар хавфсизлигини таъминлаш бўйича кўрилаётган чора-тадбирларга қаратилди. Аниқланган барча камчиликлар танқидий муҳокама қилиниб, келгусида хизмат фаолиятини такомиллаштиришга оид мақсадли чора-тадбирлар белгилаб олинди.

Мамлакатимизда ёшларни ҳар томонлама қўллаб қувватлаш, мурувват кўрсатиш ҳамда уларнинг ўқиши ва таълим олишлари учун зарур шарт-шароитларни яратиш мақсадида қатор ислоҳот ва ташаббуслар илгари сурилмоқда. Бу каби эзгу ишларни давоми сифатида Ички ишлар вазири генерал-лейтенант Пўлат Бобожонов ҳамда масъуллар Яшнобод тумани 30-сонли ёрдамчи “Меҳрибонлик уйи”га ташриф қилиб, ёшлар билан учрашиб мулоқот ўтказилди, шунингдек кириб келаётган Янги йил байрами арафасида совғалар улашилди.