ИИВ раҳбарияти томонидан Навоий вилоятида “Хавфсиз ва соғлом юрт” ойлиги доирасида амалга оширилаётган ишлар ўрганилди
2026-11-15 12:00:00 / Янгиликлар
Республикамиз бўйлаб ўтказилаётган "Хавфсиз ва соғлом юрт" кенг қамровли тезкор-профилактик ойлиги доирасида жойларда ҳуқуқбузарликларнинг барвақт олдини олиш, жиноятчиликка қарши курашиш ҳамда жамоат хавфсизлигини таъминлаш борасида тизимли ишлар олиб борилмоқда.
Мазкур ойлик доирасида Навоий вилоятида амалга оширилаётган ишлар ва кўрилаётган чора-тадбирлар ҳолатини кўздан кечириш мақсадида Ички ишлар вазири ўринбосари, генерал-майор Б.Ю. Мирзарахимов томонидан қатор ўрганишлар олиб борилди.
Дастлаб Кармана тумани, шундан сўнг, Навбаҳор тумани ички ишлар бўлимларида ташкил этилган тезкор-штаб фаолияти ўрганилди. Шунингдек, ходимларнинг хизмат интизоми ва қонунийликка риоя этиши, маҳаллаларда жиноятчиликнинг олдини олиш борасида бириктирилган масъул соҳа вакилларининг ўзларига юклатилган вазифаларга бўлган ёндашувлари атрофлича таҳлил қилинди.
Бундан ташқари, Вазир ўринбосари Навбаҳор туманида уюшқоқлик билан ўтказилаётган "Яшил макон" умуммиллий лойиҳасида қатнашиб, табиатни асраш ва юртимизни янада кўркамлаштириш йўлидаги ушбу хайрли ишга ўз ҳиссасини қўшди.
Ўрганишлар якунида келгусида ўтказилиши режалаштирилган профилактик тадбирларни янада жадаллаштириш, маҳаллаларда хавфсиз муҳитни яратиш ҳамда "Хавфсиз ва соғлом юрт" кенг қамровли тезкор-профилактик ойлиги доирасида белгиланган устувор вазифаларни самарали бажариш юзасидан масъул соҳа вакилларига тегишли кўрсатма ва топшириқлар берилди.
Ҳудудлар бўйлаб ўрганиш ишлари давом этмоқда.
Навоий вилояти ИИБ Ахборот хизмати