Мамлакатимиз миқёсида ўтказилаётган “Хавфсиз ва соғлом юрт” тадбирларининг дастлабки ўн кунлиги натижалари ҳамда аҳолини энергия ресурслари билан таъминлаш борасида белгиланган вазифалар ижроси таҳлил қилинди
2026-11-14 08:00:00 / Янгиликлар
Ноябрь ойининг дастлабки кунидан юртимиз миқёсида “Хавфсиз ва соғлом юрт” тадбирларининг учинчи босқичи олиб борилмоқда. Ички ишлар вазири раҳбарлигида ўтказилган навбатдаги йиғилишда ойлик давомида ўтказилган тезкор-профилактик тадбирлар кун тартибидаги асосий масала бўлди.
Давлатимиз раҳбари томонидан белгиланган устувор вазифалар, миллат генофондини гиёҳвандлик иллатидан муҳофаза қилиш, аҳоли айниқса ёшлар ўртасида наркожиноятларни барвақт олдини олиш бўйича энг муҳим масалалар айнан “Хавфсиз ва соғлом юрт” тадбирларида қамраб олинган.
Ойликнинг дастлабки ўн кунида ҳамкорликдаги тезкор-профилактик тадбирлари давомида эришилган натижалар, кўча ва жамоат жойларида йўлга қўйилган хизмат фаолияти, маҳаллий ҳокимликлар, ҳуқуқни муҳофаза қилиш органлари ва ёшлар ташкилотлар билан олиб борилаётган узвий ҳамкорлик масалаларига жиддий эътибор қаратиш зарурлиги қайд этилди.
Бу борада ҳудудий тузилмалар ва соҳавий хизмат масъуллари олдига белгиланган вазифалар, маҳаллаларда хавфсиз муҳитни таъминлашда кўзга ташланаётган муаммолар муҳокама қилинди.
Йиғилишда ҳозирги куннинг муҳим йўналишлардан бири энергетика ресурслари, суюлтирилган газ ва кўмир маҳсулотларини аҳолига ўз вақтида узлуксиз етказиб бериш масалалари атрофлича таҳлил қилинди.
Мазкур йўналишда ташкил этилган ишчи гуруҳ фаолиятини доимий мувофиқлаштириш орқали кафолатли таъминот занжирини яратиш бўйича келгусида бажарилиши зарур бўлган вазифалар белгилаб олинди.
Шунингдек, аҳоли ўртасида соғлом турмуш тарзини тарғиб қилиш, Аралаш жанг санъатлари (ММА) ва Волейбол федерациялари фаолиятини такомиллаштириш, профессионал спортчилар ва жамоаларни шакллантириш, мураббийлар мактабини яратиш ва янги иқтидорларни кашф этиш бўйича олиб борилаётган ишлар тақдимот қилинди.
Ҳудудий федерация раҳбарларига мавжуд моддий техник базани ривожлантириш, жамоалар учун зарурий шароитларни ташкил этиш бўйича кўрсатмалар берилди.