Ўзбекистон Республикаси Ички ишлар вазирлиги

Ҳаётнинг мазмуни хотиралар билан ўлчанади. Унинг қадри эса босиб ўтилган умр йўлининг залвори билан тилга олинади, эсланади ва яхши сўзлар билан ёд этилади.

Ана шу ҳақиқат ҳар йили 25-октябрь — Ички ишлар органлари ходимлари кунида янада яққол намоён бўлади. Бу кун аввало хизмат вазифасини бажариш чоғида ҳалок бўлган ходимларни ёд этиш, уларнинг пок хотирасига ҳурмат бажо келтиришдан бошланади.

Ички ишлар вазирлиги раҳбарияти, шахсий таркиб, фахрийлар ҳамда вазирлик тасарруфидаги таълим муассасалари ўқувчи ва курсантлари саф тортиб, «Ғалаба боғи» ёдгорлик мажмуасидаги «Миллат фидойилари» композицияси пойига гулчамбар қўйишди. Оркестр қадрлаш куйини ижро этди. Миллатнинг бугунги куни, осойишта ва бехавотир замон учун жон фидо этган, она юртнинг асл фарзандлари эсга олинди. Ҳамкасблари ва оила аъзолари уларнинг кўрсатган ибратли ҳаёт йўли ҳамда хизмат йилларини хотирлашди.

Бу йил — мустақиллигимизнинг 35 йиллиги ҳамда Янги Ўзбекистон Ички ишлар органларининг касб байрами муносабати билан шу муқаддас масканнинг аҳамияти янада ёрқинроқ намоён бўлмоқда. Зеро миллат фидойиларининг жасорати — мустақилликнинг мустаҳкам тамал тоши, тинчлик ва осойишталикнинг бебаҳо гаровидир.

«Миллат фидойилари» композицияси Янги Ўзбекистондаги бунёдкорлик ишлари орасида алоҳида ўрин эгаллаган «Ғалаба боғи»нинг узвий давомидир. Мажмуа мустақиллик йилларида Ватан ҳимояси, эл-юрт тинчлиги ва осойишталиги йўлида қаҳрамонларча ҳалок бўлган ҳарбий хизматчилар ҳамда ҳуқуқ-тартибот органлари ходимларининг хотирасини абадийлаштириш мақсадида Президентимиз Шавкат Мирзиёевнинг ғояси асосида барпо этилган ва 2025 йилда очилган.

Мажмуада 196 нафар қаҳрамоннинг номи зарҳал ҳарфлар билан ёзилган.

Бу ерда марҳум ходимларнинг босиб ўтган йўлини рақамлашган мультимедиа шаклида кўриш, уларнинг шонли фаолияти билан яқиндан танишиш мумкин.

Давлат раҳбари таъкидлаганидек: Ушбу мажмуа «Ватан ҳимояси ҳар бир авлоднинг муқаддас иши экани, ватанпарварлик анъаналари давомийлигини» эслатиб туради.

Жасорат — ижодкорларга илҳом берувчи энг буюк хислатлардан биридир. Ички ишлар органларининг 35 йиллигига бағишланиб, Ички ишлар вазирлиги томонидан тайёрланган ва миллат қаҳрамонларининг абадий хотирасига бағишланган хотира китоб, марҳум ходимларнинг оила аъзоларига вазирлик раҳбарияти томонидан топширилди.

Тадбир иштирокчилари ходимларнинг ота-оналари, оила аъзолари ва фарзандлари билан суҳбатлашиб, уларнинг бугунги куни, келажак режалари ва орзулари ҳақида сўзлашди.

Бу каби тадбирлар барча ҳудудий ички ишлар органларида ташкил этилиб, байрам муносабати билан хизмат вақтида ҳалок бўлган ходимларнинг оила аъзолари ва фахрийлар ҳолидан хабар олинмоқда.

Шундай қилиб, ҳар бир гулчамбар, ҳар бир хотира китоби ва ҳар бир самимий суҳбат — жон фидо этганларнинг руҳи олдидаги қарздир. Уларнинг ҳаёти биз учун намуна, уларнинг хотираси эса халқимиз қалбида абадий яшайди.