Ўзбекистон Республикаси Ички ишлар вазирлиги

Ўзбекистон Республикаси Ички ишлар вазири генерал-лейтенант Азиз Ташпулатов бошчилигидаги делегация жорий йилнинг 1 октябр куни Душанбе шаҳрида бўлиб ўтган Мустақил давлатлар ҳамдўстлигига аъзо давлатлар ички ишлар вазирлари Кенгашининг анъанавий навбатдаги йиғилишида қатнашдилар.

Тадбир доирасида делегация раҳбарларини Тожикистон Республикаси Президенти Эмомали Раҳмон қабул қилди.

Учрашувда томонлар халқаро майдонда терроризм, экстремизм, наркотрафик ва уюшган жиноятчиликка қарши курашиш, шунингдек, киберхавфсизлик, ноқонуний миграция ва туристларни хавфсизлигини таъминлаш соҳаларида ҳамкорлик механизмларининг самарадорлигини ошириш масалалари муҳокама қилинди.

Тожикистон давлат раҳбари МДҲ давлатларининг ўзаро иқтисодий ва сиёсий ҳамкорлиги, шу жумладан ҳуқуқни муҳофаза қилиш йўналишидаги алоқалари такомиллашиб юқори даражага кўтарилаётганлигидан мамнунлик билдириб, бу масалада минтақавий ҳамжиҳатлик ва мувофиқлаштирилган ёндашувларни кучайтириш зарурлигини қайд этди.

Шундан сўнг Ички ишлар вазирларининг Кенгаши ўз ишини бошлади.

Йиғилишида Ўзбекистон Республикаси билан биргаликда халқаро ҳамкорлар Озарбайжон, Арманистон, Беларусь, Қозоғистон, Қирғизистон, Россия, Тожикистон ва Туркманистон ички ишлар вазирликлари раҳбарлари, шунингдек, МДҲга аъзо давлатлар ҳудудида уюшган жиноятчилик ва бошқа хавфли жиноятларга қарши курашни мувофиқлаштириш Бюроси, Ҳамдўстлик мамлакатларининг Ижроия қўмитаси ва Аксилтеррор маркази масъуллари қатнашдилар.

Томонлар МДҲ доирасидаги кўп томонлама ҳамда икки томонлама ҳамкорликнинг устувор масалаларини, шунингдек, МДҲ мамлакатлари ички ишлар вазирликлари Кенгаши доирасида қабул қилинган 2029–2033 йилларда жиноятчиликка қарши курашиш бўйича қўшма чора-тадбирлар бўйича Давлатлараро дастурини амалга оширишга доир масалаларни муҳокама қилдилар.

Тадбир жараёнида бир қатор масалалар юзасидан тегишли ҳужжатлар имзоланди, жумладан, минтақа ички ишлар органларининг ахборотларни электрон алмашиш соҳасидаги ҳамкорлиги, жиноятчиликка қарши курашиш йўналишида геном маълумотларини алмашиш, ноқонуний миграцияга қарши курашиш соҳасидаги ҳужжатларни такомиллаштириш, шахсларни давлатлараро қидирувини амалга оширишдаги ҳамкорлигини ривожлантириш, ахборот-коммуникация технологияларидан фойдаланган ҳолда содир этилган ҳамда бошқа турдаги трансмиллий жиноятлар билан курашиш борасидаги ҳамкорликнинг истиқболли йўналишлари ва бошқалар.

Шу билан бирга, Ўзбекистон томонидан киритилган муҳим ташаббус “Мустақил Давлатлар Ҳамдўстлигига аъзо давлатлар ички ишлар вазирликларининг кибержиноятчиликка қарши курашиш бўлинмалари раҳбарлари йиғилишларини ташкил этиш тўғрисида”ги қарор Кенгаш аъзолари томонидан бир овозда маъқулланиб, имзоланди.

Мазкур ташаббус замонавий кибержиноятчиликнинг трансчегаравий хусусиятидан келиб чиқиб, бюрократик жараёнларни қисқартирган ҳолда тезкор бўғин раҳбарлари ўртасида тўғридан-тўғри ва ишончли мулоқотни йўлга қўйишга қаратилган.

Мунтазам учрашувлар илғор тажриба алмашиш, ахборот технологиялари соҳасидаги таҳдидларни таҳлил қилиш ва виртуал маконда трансмиллий жиноятчиликка қарши самарали чораларни ишлаб чиқиш имконини беради.

Тадбирлар дўстона ва конструктив руҳда ўтган бўлиб, томонлар келгусидаги алоқаларни институционал даражада ривожлантиришга, амалий натижаларга йўналтирилган қўшма лойиҳаларни амалга оширишга келишиб олдилар.