Ўзбекистон Республикаси Ички ишлар вазирлиги

Елкасида курсантлик погони, қўлида қасамёд матни ва қалбида чексиз ғурур билан саф тортган минглаб йигит-қизлар бугун шарафли бурч, ватан ҳимоясига киришиш арафасида турибдилар.

Академиянинг ўқув дала полигонида жисмоний-жанговар ҳамда ҳарбий тайёргарликдан ўтиб, машғулотларда тобланган, Ватан ҳимоячиси деган туйғуни юракдан ҳис этган курсантларнинг ҳар бири Она Ватанимиз истиқлолининг рамзи бўлган муқаддас Мустақиллик монументи остида бирма-бир қасамёд қабул қилдилар.

Бир хил либосда, монанд ҳаракатларни амалга ошираётган ҳамда муштарак мақсад бирлаштирган бу ёшларнинг дилларини ҳаяжон титроғига солиб жаранглаган ҳар бир жумла, курсантларнинг Ватанга бўлган садоқатини, унинг тинчлигини кўз қорачиғидек асрашга йўлидаги қатъиятини намоён этди.

Янги Ўзбекистон ички ишлар органлари ходимлари сафига қўшилган курсантларни тантанали сафга қабул қилиш маросими Академияда кўтаринки руҳда ташкил этилди.

Тантанали тадбир Ички ишлар вазири генерал-лейтенант Азиз Ташпулатов томонидан очиб берилди. Давлатимиз раҳбари таъкидлаганидек “Учинчи ренессанс” бунёдкорлари бўлган бу йигит-қизларга билдирилаётган ишонч бир неча йиллар ўтиб албатта ўз натижасини беради. Уларга тинимсиз билим олиш, ўз устида ишлаш учун яратилган шароитьлардан унумли фойдаланиб, ҳуқуқни муҳофаза қилиш ва жамоат хавфсизлигини таъминлаш соҳасини мукаммал ўрганиш асосий вазифа эканлиги таъкидланди.

Қайд этиш жоизки, Академиянинг кундузги таълим бакалавриатида қабул квотаси 2024/2025 ўқув йилидан бошлаб 700 тадан 900 тага оширилди, жорий йилдан эса 1 100 тага етказилди. Кадрлар тайёрлаш сифатини янада ошириш ва рақамли таълим муҳитини яратиш мақсадида Академия инфратузилмаси тубдан модернизация қилиниб, энг сўнгги технологиялар билан жиҳозланган янги инновацион бино ва иншоотлар барпо этилмоқда.

Ёшларга оид давлат сиёсатини изчил амалга ошириш мақсадида Иқтидорли курсантлар кенгаши ташкил этилиб, билимли, ташаббускор ва фидойи курсантлар учун “Жалолиддин Мангуберди” номидаги стипендия, “Академия аълочиси”, “Иқтидорли курсант” кўкрак нишонлари ҳамда “Чўлпон” кўкрак нишони ва стипендияси таъсис этилди.

Давлатимиз раҳбарининг жорий йил 26 августдаги “Ички ишлар органлари учун профессионал кадрларни тайёрлаш тизимини трансформaция қилиш чоратадбирлари тўғрисида”ги 303-сон қарори билан эндиликда Академияда таълим жараёни кредит-модуль тизими асосида ташкил этилади. Курсантлар биринчи курсдан бошлаб ИИВ соҳавий хизматлари ва ҳудудий бўлинмаларига бириктирилиб, битирувчи курс курсантларига ўқишни якунлагунга қадар “катта сержант” махсус унвони берилади.

Кўрсаткичларини реал вақт режимида жамлаб бориш мақсадида яхлит рақамли портфолио яратилиб, кадрларнинг хизмат фаолиятидаги ўсиш салоҳиятини прогноз қилиш ва уларга “истиқболли карьера” модели бўйича тавсиялар бериш амалиёти жорий этилади.

Мухтасар айтганда, янги қарор асосида ички ишлар органлари учун профессионал кадрларни тайёрлашнинг ягона, узлуксиз ва замонавий тизими йўлга қўйилиб, таълим сифати ва самарадорлиги мутлақо янги босқичга олиб чиқилади.

Шундан сўнг, Ички ишлар вазири томонидан курсантларни қасамёдларида келтирилган ваъдалари қабул қилиниб, Академия имзосига айлаган анъанавий саф юриши бошланди.

Ҳар бир курсант қасамёдини дилига жойлаб, вазирлик раҳбарияти, нуфузли меҳмонлар, шахсий таркиб ва ота-оналарининг нигоҳи олдида Ватанига, халқига ва Президентига садоқат билан хизмат қилишга аҳд қилдилар.

Мана шу ўзгармас ва йиллар давомида ходимларнинг жон томирига сингиб кетган сўзлар, бугундан ушбу ёш кадрлар ички ишлар органлари тизимининг келажаги эканлигидан далолат беради.

Шунингдек тадбирда бир гуруҳ юқори босқич курсантларига стипендия гувоҳномалари ҳам топширилди. Хусусан, 2-босқич курсантлари Рухшона Муродилаева, Акобир Файзуллоев ҳамда 3-босқич курсантлари Севинч Очилова ва Элбек Азимовлар “Ички ишлар вазири стипендиати” фахрий ёрлиғи билан тақдирланди.

“Ички ишлар вазирлигининг Жалолиддин Мангуберди номидаги стипендиати” фахрий ёрлиғи эса 2-босқич курсанти Абубакир Исохонов ва 3-босқич курсанти Диёрбек Камолдиновларга топширилган бўлса, 3-босқич курсанти Сарвиноз Умарова “Олий Бош қўмондон” давлат стипендияси соҳиби” сифатида эътироф этилди.

Тадбирда сўз олганлар бугунги куннинг бўлажак офицерлар фаолиятидаги аҳамияти, Академияда Янги Ўзбекистон ички ишлар органлари ходимларини тайёрлаш учун сўнги йилларда йўлга қўйилган ўзига хос тизим, ота-оналарнинг фарзандларидан кутаётган юксак натижалари ҳақида тўхталиб, ёшларга яна бир бор ишонч билдиришди.

Курсантлар олдида уч йиллик машаққатли шу билан бирга ҳар қандай инсонни юксалтирувчи ўқув йиллари турибди. Қувонч кўз ёшлари билан фарзандини қучаётган ота-оналар, акасига ҳавас билан боқиб турган жажжи болажонлар бугун уларнинг муваффақиятидан ватан осойишталигини таъминлашдек шарафли бурчга бел боғлаганидан фахрланмоқда.