Андижон вилоятида халқ депутатлари вилоят Кенгашининг навбатдан ташқари сессиясида Давлат раҳбарининг ҳудудларда жиноятчиликни жиловлаш билан боғлиқ топшириқларнинг ижроси муҳокама қилинди
2026-09-04 20:45:00 / Янгиликлар
Тадбирда вилоят ҳокими Шухратбек Абдурахманов, Ўзбекистон Республикаси Президенти Администрациясининг масъуллари, Ички ишлар вазирлиги мутасаддилари, халқ депутатлари Кенгаши аъзолари, шаҳар ва туманлар жамоатчилик фаоллари, шунингдек, ҳуқуқни муҳофаза қилувчи органлар раҳбарлари иштирок этди.
Сессия доирасида ташкилий масала кўриб чиқилди.
Ички ишлар вазирининг буйруғига асосан, илгари Хоразм вилояти Ички ишлар бошқармаси бошлиғи лавозимида хизмат қилган полковник Шермухамедов Абдумажид Мавлянович Андижон вилояти Ички ишлар бошқармаси бошлиғи этиб тайинланди.
Йиғилиш давомида Ўзбекистон Республикаси Президентининг жорий йилда маҳаллаларда хавфсиз муҳитни шакллантириш, ҳуқуқбузарликларни барвақт аниқлаш ва уларнинг олдини олиш тизимини янада такомиллаштиришга қаратилган қарори ижроси юзасидан амалга оширилган ишлар атрофлича ва танқидий таҳлил қилинди. Соҳага оид белгиланган вазифаларнинг бажарилишига ҳам алоҳида эътибор қаратилди.
Ҳудуддаги криминоген ҳолат таҳлили асосида вазиятни янада яхшилаш мақсадида янги тайинланган раҳбар зиммасига жиноятчиликни жиловлаш, маҳаллаларда хавфсиз муҳитни мустаҳкамлаш, аҳоли мурожаатлари билан манзилли ишлаш, фуқаролар розилигини таъминлаш, шунингдек, мавжуд муаммоларни аниқлаб, уларни тизимли ҳал этишга қаратилган аниқ вазифалар юклатилди. Шу билан бирга, шаҳар ва туман ИИБ раҳбарларига ушбу йўналишлардаги профилактик ва амалий ишлар самарадорлигини ошириш бўйича тегишли топшириқлар берилди.
Сессия якунида муҳокама этилган масалалар юзасидан масъул ходимлар ва соҳа мутахассисларининг таклиф-мулоҳазалари тингланиб, мавжуд муаммоларни бартараф этиш ҳамда белгиланган вазифаларни изчил амалга ошириш бўйича кейинги устувор чора-тадбирлар белгилаб олинди.