Республика мувофиқлаштириш штаби аъзолари ва ишчи гуруҳи томонидан Қорақалпоғистон Республикасида тергов ҳибсхонаси фаолияти ўрганилди
2026-09-02 14:00:00 / Янгиликлар
Бош прокурорнинг биринчи ўринбосари Б.Валиев раҳбарлигидаги республика мувофиқлаштириш штаби аъзолари ва ишчи гуруҳи томонидан, аввало, инсон ҳуқуқ ва эркинликларини таъминлаш, тергов ҳибсхоналарида қонунчилик талабларига сўзсиз риоя этилишини назорат қилиш, сақланаётган шахслар учун муносиб шарт-шароитларни янада такомиллаштириш, шунингдек, сақланаётган аёллар саломатлигини мустаҳкамлаш мақсадида Нукус шаҳрида жойлашган тергов ҳибсхонасида ўрганиш ишлари олиб борилди.
Жумладан, муассасада сақланаётган аёллар ва вояга етмаганлар учун яратилган шарт-шароитларга алоҳида эътибор қаратилиб, уларнинг ҳуқуқ ва қонуний манфаатларини таъминлаш, тиббий хизмат кўрсатиш, санитария-гигиена талабларига риоя этиш, яшаш шароитлари ҳамда тергов ҳаракатлари жараёнида қонунчилик талабларига амал қилиниши ҳолати атрофлича ўрганилди.
Аниқланган ҳолатлар юзасидан амалдаги қонунчилик талабларидан келиб чиққан ҳолда масъулларга тегишли топшириқлар берилди.
Ташриф давомида ишчи гуруҳи аъзолари тергов ҳибсхонасида сақланаётган шахслар билан бевосита мулоқот қилиб, уларни қийнаётган муаммоларни ўргандилар.
Суҳбатлар давомида уларнинг яшаш шароитлари, тиббий хизматдан фойдаланиш имкониятлари, тергов жараёни, қаровсиз қолган вояга етмаган фарзандларига васий белгилаш, шунингдек, бошқа масалалар юзасидан мурожаатлари тингланди.
Ҳар бир мурожаат юзасидан қонуний ечимлар ишлаб чиқиш ва уларни белгиланган тартибда кўриб чиқиш бўйича масъулларга тегишли топшириқлар берилди ҳамда уларнинг ижроси назоратга олинди.
Шунингдек, тергов ҳибсхонасида сақланаётган аёлларнинг саломатлигини чуқурлаштирилган тиббий кўрикдан ўтказиш ташкил этилди.
Республика идоралараро мувофиқлаштириш штабининг Қорақалпоғистон Республикасидаги ўрганишлари давом этмоқда.