Қорақалпоғистон Республикасида аҳоли мурожаатлари ўрганилиб, ички ишлар органларининг хизмат фаолияти ва инфратузилма объектлари кўздан кечирилди
2026-08-01 09:00:00 / Янгиликлар
Ўзбекистон Республикаси Ички ишлар вазири ўринбосарлари — полковник Диёрбек Саттаров ва полковник Рустам Мирзаев томонидан Қорақалпоғистон Республикаси ички ишлар органларининг хизмат фаолияти комплекс ўрганилди.
Ташриф доирасида Нукус шаҳридаги Ёшлар марказида аҳоли мурожаатларини манзилли ўрганиш ва мавжуд муаммоларга амалий ечим топиш мақсадида сайёр қабул ўтказилди.
Қабул давомида 47 нафар фуқаронинг 10 та йўналишдаги мурожаати кўриб чиқилиб, уларнинг 23 таси жойида ижобий ҳал этилди, 15 таси бўйича ҳуқуқий маслаҳат ва тушунтиришлар берилди. Қўшимча ўрганиш талаб этилган 9 та мурожаат ижрога қаратилиб, масъулларга тегишли топшириқлар берилди. Шунингдек, қабул доирасида биринчи маротаба ИД-карта олаётган 10 нафар ёшга ҳамда Ўзбекистон Республикаси фуқароси деб тан олинган бир гуруҳ ҳамюртларимизга шахсини тасдиқловчи ҳужжатлар тантанали равишда топширилди.
Ташриф давомида ИИВ Малака ошириш институти Нукус филиалининг янги қурилаётган биносида амалга оширилаётган бунёдкорлик ишлари, келгусида ходимларни ўқитиш ва касбий тайёргарлигини ошириш учун яратилаётган замонавий шарт-шароитлар ўрганилди.
Қорақалпоғистон Республикаси ИИВ Йўл ҳаракати хавфсизлиги бошқармаси Маъмурий амалиёт марказида ходимларнинг хизмат фаолияти, иш жараёнлари ва улар учун яратилган шароитлар билан танишилди.
Тахиатош тумани Ички ишлар бўлимида эса ҳудуддаги криминоген вазият, жиноятчилик ва ҳуқуқбузарликларнинг олдини олиш борасида амалга оширилаётган профилактик ишлар муҳокама қилинди. Аҳоли билан манзилли ишлаш, профилактика инспекторлари фаолияти самарадорлигини ошириш, замонавий ахборот технологияларидан кенг фойдаланиш, хизмат интизоми ва ходимларнинг касбий салоҳиятини мустаҳкамлаш бўйича устувор вазифалар белгилаб берилди.
Шу билан бирга, «Жайҳун» маҳалла фуқаролар йиғини, профилактика инспекторининг хизмат уйи ва маҳаллада жамоат хавфсизлигини таъминлаш борасида ташкил этилган ишлар ҳам ўрганилди.
Ўрганишлар якунида аниқланган масалаларни бартараф этиш, хизмат самарадорлигини янада ошириш, фуқаролар мурожаатларига тезкор ва қонуний ечим топиш бўйича масъул раҳбарларга тегишли топшириқ ва тавсиялар берилди.