Ўзбекистон Республикаси Ички ишлар вазирлиги

Маросимда Ички ишлар вазири томонидан аҳоли саломатлигини мустаҳкамлаш, соғлом авлодни тарбиялашнинг муҳим омили сифатида мамлакатимизда спорт кенг ривожланаётганлиги, ички ишлар органлари ходимларининг саъй ҳаракатлари билан маҳаллалардаги соғлом муҳит, ҳудудий мусобақалар, «Беш ташаббус олимпиадаси» таъсирида спортсеварлар сафи кенгайиб бораётганлиги, улар орасидан маҳоратли профессионал спортчилар тайёрланаётганлигига алоҳида урғу берилди.

Шунингдек, бу йилги Олимпия ўйинларида спортчиларимиз Янги Ўзбекистон ёшлари қандай кучга эга эканлигини бутун дунёга кўрсатганлиги ва бу спортчилар орасида Ички ишлар вазирлиги ходимлари борлиги тизимдаги ёшлар учун катта мотивация бераётганлиги эътироф этилди.

Хизмат вазифаларига сидқидилдан ёндашиб, ички ишлар органларида соғлом турмуш тарзини кенг тарғиб қилиш, шахсий таркиб орасида спорт турларини янада оммалаштириш ишларига қўшган муносиб ҳиссаси ҳамда Франциянинг Париж шаҳрида ўтказилган ХХХIII ёзги Олимпия ўйинларида фаол иштирок этганликлари учун бир қатор ходимлар мукофотланди, жумладан:

олтин медаль соҳиблари лейтенант Абдумалик Халоков ҳамда лейтенант Лазизбек Муллажоновларга муддатидан аввал «Катта лейтенант» махсус унвони ҳамда эсдалик совғаси билан;

бронза медаль соҳиби сафдор Музаффарбек Турабоев «Лейтенант» махсус унвони ҳамда эсдалик совғаси билан;

олимпия ўйинлари иштирокчилари, жаҳон чемпионати бронза медаль соҳиби лейтенант Исломжон Баҳрамов, ёзги Осиё ўйинлари олтин медаль соҳиби кичик сержант Екатерина Воронина, икки карра Осиё чемпионати бронза медаль соҳиби кичик сержант Актенге Кеунимжаева, икки карра ёзги Олимпия ўйинлари иштирокчиси, уч карра Осиё чемпионати совриндори сафдор Шарофиддин Болтабоев, Осиё ва Жаҳон чемпионати бронза медаль соҳиби сафдор Муроджон Йўлдошев ва Жаҳон чемпионати олтин медаль соҳиби сафдор Арам Варданян Ички ишлар вазирининг «Фахрий ёрлиғи» ва эсдалик совғаси билан;

спортнинг Бокс тури устаси, Жаҳон чемпиони, майор Исроил Мадримов «Аъло хизматлари учун» кўкрак нишони ҳамда эсдалик совғаси билан тақдирландилар.

Тантанали тадбирда мукофотланган ходимлар ҳамда Олимпиада чемпионлари сўзга чиқиб мамлакатимизда, шунингдек ички ишлар органлари тизимида ходимларни спорт билан шуғулланиши учун яратилаётган шароит ва уларга эътибор, ёшлар сиёсати ва спорт соҳасига қаратилаётган мақсадли ислоҳотларни эътироф этиб ўтдилар.