Ўзбекистон Республикаси Ички ишлар вазирлиги

Фахрийларни қадрлаш, уларнинг кўп йиллик меҳнати ва ҳаётий тажрибасини муносиб баҳолаш ички ишлар органларининг эзгу ва давомий анъаналаридан бири ҳисобланади. Чунки бугунги муваффақиятлар замирида устозлар яратган тажриба мактаби, улар тарбиялаган шогирдлар ва Ватанга садоқат ғояси мужассам.

Навбатдаги тантанали тадбир ана шу эзгу қадриятларнинг ёрқин намунаси бўлди.

Маросимда ички ишлар органларида узоқ йиллар самарали хизмат қилган, Ички ишлар вазирлиги Фахрийлар кенгаши раиси, истеъфодаги генерал-майор Эркин Норгитовнинг муборак 80 йиллик юбилейи билан муборакбод этилди.

Тадбирда сўз олган Ички ишлар вазирлиги раҳбарияти ва меҳмонлар — фахрийлар тизимнинг бебаҳо бойлиги эканини алоҳида таъкидлади. Бугунги кунда ички ишлар органларининг 96 минг нафардан зиёд фахрийси ўзининг бой ҳаётий ва хизмат тажрибасини ёш авлодга ўргатиб, уларни Ватанга садоқат, касбга фидойилик ва халққа хизмат қилиш руҳида тарбиялашга муносиб ҳисса қўшиб келмоқда.

Фахрийларнинг жамият ҳаётидаги фаоллиги ҳам алоҳида эътироф этилди. Ҳозирги кунда уларнинг 4 820 нафари турли вазирлик ва идораларда меҳнат қилмоқда, 775 нафари маҳалла раиси, 29 нафари маҳаллий Кенгаш депутати, 1 нафари эса Ўзбекистон Республикаси Олий Мажлиси Сенати аъзоси сифатида халқ хизматида фаолият юритмоқда. Бу эса фахрийларнинг нафақат тизим, балки мамлакат тараққиётида ҳам муносиб ўрин тутаётганини кўрсатади.

Тадбирда Эркин Норгитовнинг ҳаёти ва фаолиятига бағишланган ҳужжатли фильм намойиш этилди. Унда устознинг ички ишлар органларидаги машаққатли ва шарафли меҳнат йўли, раҳбарлик фаолияти, юксак инсоний фазилатлари ҳамда минглаб шогирдлар тарбиясидаги хизматлари ёрқин акс эттирилди.

Тадбир давомида ички ишлар вазири яна бир муҳим ҳақиқатга урғу берди: инсонни эгаллаган лавозими эмас, балки унинг Ватан олдидаги ҳалол хизмати, халқ ишончига сазовор бўлган фаолияти ва тарбиялаган муносиб шогирдлари улуғлайди. Эркин Норгитовнинг ҳаёт йўли айнан шу эзгу фазилатларни ўзида мужассам этган ибрат мактабидир.

Тантанали тадбирнинг мантиқий давоми сифатида мамлакатимизда амалга оширилаётган кенг кўламли ислоҳотларга муносиб ҳисса қўшаётган, Ватанга садоқат ва касбга фидойилик намунасини кўрсатаётган ёш ходимларни рағбатлантириш маросими бўлиб ўтди.

Ўзбекистон Республикаси Президентининг ““Мард ўғлон” давлат мукофоти билан тақдирлаш тўғрисида”ги қарори ҳамда ички ишлар вазирининг буйруғига мувофиқ, Тошкент шаҳар ИИББ Тезкор вазифаларни бажарувчи сафарбар баталони катта мутахассис-мергани, сержант Дилшодбек Улуғбек ўғли Юлдашев юксак «Мард ўғлон» давлат мукофоти билан тақдирланди.

Ушбу мукофот юртимиз тинчлиги ва осойишталигини таъминлаш, халқ манфаатларини ҳимоя қилиш йўлида хизмат қилаётган ёш ходимларга кўрсатилаётган юксак ишонч ва эътиборнинг яна бир ёрқин ифодасидир.

Тадбир якунида бир ҳақиқат яна бир бор ўз тасдиғини топди: ички ишлар органларининг кучи – тажрибали устозлар ва уларнинг муносиб ворислари бўлган фидойи ёшлар бирлигидадир. Ана шундай ворисийлик анъанаси тизим тараққиёти, халқ тинчлиги ва Янги Ўзбекистоннинг эртанги куни учун мустаҳкам пойдевор бўлиб хизмат қилмоқда.