ИИВ раҳбарияти томонидан Қашқадарё вилояти ички ишлар органлари фаолияти сарҳисоб қилинди
2026-07-19 09:00:00 / Янгиликлар
Қашқадарё вилоят Ички ишлар бошқармасида Ички ишлар вазири ўринбосари, полковник Рамазон Ашропов ва вилоят ИИБ бошлиғи, полковник Абдувохид Исмоиловлар иштирокида соҳавий хизматлар ҳамда шаҳар-туман ИИБ раҳбарлари иштирокида 2026 йилнинг 6 ойлик якунларига бағишланган ҳисобот йиғилиши ўтказилди.
Ички ишлар вазири ўринбосари, полковник Рамазон Ашропов ва вилоят ИИБ бошлиғи, полковник Абдувохид Исмоиловлар бошчилигида олиб борилган йиғилишда амалдаги йилнинг ўтган 6 ойи давомида Қашқадарё вилоятидаги криминоген вазият, жиноятчилик динамикаси ҳамда ҳуқуқбузарликларнинг олдини олиш борасида амалга оширилган ишлар юзасидан ахборот берилди.
Шундан сўнг, вилоят ҳудудида соҳавий хизматлар ва шаҳар-туман ички ишлар бўлимлари томонидан ҳуқуқбузарлик ва жиноятчиликнинг барвақт олдини олиш, криминоген вазияти мураккаб ҳудудларда амалга оширилган ишлар, жиноятчиликни жиловлашда йўл қўйилган камчиликлар танқидий-таҳлилий муҳокама қилинди. Унда барча туман ва шаҳарда фаолият олиб бораётган ички ишлар органлари масъуллари видеоконференц алоқа форматида уланишди.
Йиғилиш давомида жорий йилнинг 6 ойи давомида жиноят ва ҳуқуқбузарликларнинг олдини олиш, қонун устуворлигини таъминлаш, жамоат тартибини сақлаш, аҳоли хавфсизлигини мустаҳкамлаш ҳамда фуқаролар учун хавфсиз муҳит яратиш йўлида амалга оширилган ишлар сарҳисоб қилиниб, йўл қўйилган хато ва камчиликлар кўрсатиб ўтилди. Шунингдек, йилнинг иккинчи ярми учун устувор вазифалар белгилаб берилди.
Якунда масъулларга давлатимиз раҳбарининг маҳаллаларда хавфсиз муҳитни таъминлашга қаратилган қарорлари ижросини сўзсиз таъминлаш, “еттилик“ тизими ва ҳуқуқни муҳофаза қилувчи бошқа идоралар билан ўзаро ҳамкорликни янада кучайтириш, профилактика ишларининг самарадорлигини ошириш бўйича масъул раҳбарларга аниқ топшириқлар берилди.