Ўзбекистон Республикаси Ички ишлар вазирлиги

Бугун, 11 июль куни Бош прокурор Ниғматилла Йўлдошев раислигида республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш бўйича навбатдаги Республика идоралараро кенгайтирилган йиғилиши ўтказилди.

Видеоселектор тарзида ўтказилган мазкур йиғилишда Бош вазир ўринбосари – Оила ва хотин-қизлар қўмитаси раиси Д.Каттахонова, Ўзбекистон Республикаси Президенти Администрацияси, Парламент ва Ҳукумат аъзолари, ҳуқуқни муҳофаза қилувчи идоралар, тегишли вазирлик ва идораларнинг раҳбарлари, Республика идоралараро мувофиқлаштириш штабининг аъзолари, вилоят, туман-шаҳар ҳокимлари, прокурорлар, ички ишлар идоралари раҳбарлари, ҳудудий ишчи гуруҳ аъзолари, шунингдек бошқа идоралар вакиллари иштирок этдилар.

Йиғилишда Ўзбекистон Республикаси Президентининг 05.01.2026 йилдаги 1 ва 2-сонли қарорлари ва мамлакатда жиноятчилик ва ҳуқуқбузарликларнинг олдини олишга доир вазифаларнинг жорий йил 1-ярмидаги ижроси танқидий муҳокама қилинди.

Йиғилишда Бош прокурор сўзга чиқиб, Давлат раҳбарининг ташаббуслари билан мамлакатда тинчлик ва осойишталикни таъминлаш чоралари мутлақо янгича ёндашувлар ва самарали механизмлар асосида ҳудудларда криминоген вазиятни барқарорлаштириш борасида амалга оширилган ишлар хусусида тўхталиб ўтди.

Таъкидланишича, жорий йилнинг 1-ярмида маҳаллаларда 10 мингга яқин “намунавий хавфсиз кўча” ва 5 мингдан зиёд “хавфсиз йўлак”лар ташкил этилган, аҳоли гавжум жойларга минглаб видеокузатув, юзни ва авторақамларни таниб олувчи камералар ўрнатилган. 75 мингга яқин объектлар техник қўриқловга олинган, бир неча минглаб ташвиш тугмалари, замонавий домофон комплекслари ўрнатилган, ҳуқуқбузарлик содир этиш ва ундан жабрланиш эҳтимоли бўлган фуқароларнинг маиший-ижтимоий муаммоларини ҳал этиш чоралари кўриб борилган.

Шу билан бирга Бош прокурор мутасаддилар томонидан қарорлар ижросини таъминлашда йўл қўйилаётган хато ва камчиликларни ҳар бир ҳудуд ва соҳа кесимида аниқ рақамлар ва мисоллар билан кўрсатиб берди.

Тадбирда республика идоралараро мувофиқлаштириш штаби аъзолари, масъул идоралар раҳбарлари ва ҳокимларнинг камчиликлар юзасидан тушунтиришлари ва изоҳлари эшитилди, масъулиятсизликка йўл қўйган мутасаддиларга нисбатан тегишли чоралар кўрилди.

Йиғилишда, Олий мажлис Қонунчилик палатаси қўмита раиси Д.Ширинов, Бош вазир ўринбосари – Оила ва хотин-қизлар қўмитаси раиси Д.Каттахонова, Миллий гвардия қўмондони Б.Ташматов, Ўзбекистон Маҳаллалари уюшмаси раиси К.Куранбаев, Ёшлар ишлари агентлиги директори А.Саъдуллаев ҳамда бошқа тегишли вазирлик ва идоралар раҳбарлари сўзга чиқиб, ўз фикр ва мулоҳазаларини билдиришди.

Йиғилиш натижаси бўйича тегишли қарор қабул қилиниб, ижрога қаратилди.