Ўзбекистон Республикаси Ички ишлар вазирлиги

Жорий йилнинг 5 июнь куни Бишкек шаҳрида Шанхай ҳамкорлик ташкилотига (ШҲТ) аъзо давлатлар ички ишлар ва жамоат хавфсизлиги вазирларининг йиғилиши бўлиб ўтди.

Тадбирда ШҲТга аъзо давлатларнинг ички ишлар ва жамоат хавфсизлиги вазирликлари делегациялари, шунингдек, ШҲТнинг доимий органлари, Халқаро жиноий полиция ташкилоти (Интерпол) ҳамда МДҲ ҳудудида Уюшган жиноятчилик ва бошқа хавфли жиноятларга қарши курашишни мувофиқлаштириш бюроси вакиллари иштирок этдилар.

Тадбир доирасида дастлаб делегация раҳбарлари Қирғиз Республикаси Президенти Садир Жапаров қабулида бўлдилар.

Учрашувда томонлар халқаро муносабатлар тизими тубдан ўзгариб, глобал барқарорлик жиддий синовларга дуч келаётган бугунги шароитда Шанхай ҳамкорлик ташкилоти ўзининг мустаҳкамлигини сақлаб қолмоқда ҳамда ўзаро ишонч ва хавфсизликни таъминлашнинг ишончли платформаси сифатида хизмат қилаётганлиги эътироф этилар.

Тадбир давомида замонавий даврнинг долзарб чақириқ ва таҳдидлари, хусусан, рақамли технологияларнинг жадал суръатларда ривожланиши билан боғлиқ масалалар юзасидан атрофлича фикр алмашилди.

Томонлар ахборот хавфсизлигини таъминлаш, кибермакондаги таҳдидларга қарши самарали ҳамкорликни кучайтириш муҳим аҳамият касб этишини таъкидладилар.

Йиғилиш кун тартибига биноан иштирокчилар халқаро ва минтақавий хавфсизликка доир долзарб масалаларни муҳокама қилиб, ҳуқуқни муҳофаза қилиш соҳасидаги ҳамкорликни янада ривожлантириш бўйича фикр ва таклифлар билан ўртоқлашдилар.

Айниқса, трансмиллий жиноятчиликка қарши курашиш, хавфсизликка таҳдид солаётган замонавий омилларни бартараф этиш ва мувофиқлаштирилган чора-тадбирларни кучайтириш масалаларига алоҳида эътибор қаратилди.

Кун тартибида гиёҳвандлик воситалари, психотроп моддалар ва уларнинг прекурсорларининг ноқонуний муомаласига қарши курашиш бўйича қўшма ҳаракатларни такомиллаштириш масаласи ҳам муҳим ўрин эгаллади.

Делегациялар, хусусан, синтетик гиёҳванд моддаларни ишлаб чиқариш ва тарқатишга қарши курашиш самарадорлигини ошириш, бу йўналишда ахборот алмашинуви ва тезкор ҳамкорликни мустаҳкамлаш зарурлигини таъкидладилар.

Шу билан бирга, ахборот технологиялари ёрдамида содир этилаётган жиноятларга қарши курашиш масалалари ҳам атрофлича муҳокама қилинди.

Йиғилиш иштирокчилари кибержиноятчиликка қарши самарали чоралар ишлаб чиқиш, сунъий интеллект технологияларидан фойдаланган ҳолда содир этилаётган ҳуқуқбузарликларнинг олдини олиш ва уларга қарши курашиш соҳасида амалий ҳамкорликни янада кенгайтириш муҳим аҳамиятга эга эканини қайд этдилар.

Тадбир якунида эришилган келишувларни мустаҳкамлаш ва уларнинг амалий ижросини таъминлашга қаратилган йиғилиш баённомаси имзоланди.

Йиғилиш натижалари ШҲТга аъзо давлатлар ўртасидаги кўп қиррали ҳамкорликни янада мустаҳкамлаш, минтақада тинчлик ва барқарорликни таъминлаш йўлидаги саъй-ҳаракатларни уйғунлаштиришда муҳим аҳамият касб этди.

Нуфузли анжуман доирасида бошқа режалаштирилган тадбирлар ҳам давом этмоқда.