Ички ишлар вазири Тошкент вилоятида туристик мавсумда ҳамда болалар оромгоҳларида хавфсизликни таъминлаш бўйича олиб борилаётган ишлар билан танишди
2026-05-30 20:00:00 / Янгиликлар
Ички ишлар вазири генерал-лейтенант Азиз Ташпулатов Тошкент вилояти ҳудудида туристик мавсумда фуқаролар ва сайёҳлар хавфсизлигини таъминлаш, болаларнинг ёзги дам олишини хавфсиз ташкил этиш бўйича амалга оширилаётган ишлар юзасидан ўрганишлар олиб борди.
Амалий ўрганишлар давомида дам олиш масканлари ва туристик ҳудудларда маҳаллий аҳоли ҳамда хорижий сайёҳлар хавфсизлигини таъминлаш, жамоат тартибини сақлаш ва ҳуқуқбузарликларнинг олдини олиш борасида амалга оширилаётган чора-тадбирлар кўриб чиқилди.
Шунингдек, Тошкент вилояти ИИББ Хавфсиз туризмни таъминлаш бошқармасининг Сув объектларида хавфсизликни таъминлаш бўлинмаси фаолияти ўрганилиб, бўлинма тасарруфига янги топширилган махсус катер ва гидроскутерларнинг техник имкониятлари билан танишилди.
Бириктирилган махсус техника воситаларидан хизмат фаолиятида самарали фойдаланиш бўйича масъулларга тегишли вазифалар юклатилди.
Тадбир жараёнида, Ички ишлар вазирлигига бириктирилган Бўстонлиқ туманидаги “Чимён” болалар соғломлаштириш оромгоҳининг янги мавсумга тайёргарлик ҳолати ўрганилди.
Жараёнда ёзги таътил мавсумида болаларнинг оромгоҳларда хавфсиз ва мазмунли дам олишини ташкил этиш масалалари муҳокама қилинди.
Ўрганишлар давомида масъулларга, болаларнинг хавфсизлиги ва саломатлигини таъминлаш, дам олиш жараёнини юқори савияда ташкил этиш ҳамда оромгоҳ фаолиятини янада такомиллаштириш юзасидан тегишли вазифалар юклатилиб, ижроси назоратга олинди.