Ўзбекистон Республикаси Ички ишлар вазирлиги

Иккинчи жаҳон уруши йилларида фашизмга қарши курашларда жон фидо этган аждодларимиз, уруш қатнашчилари ва фронт ортида меҳнат қилган фахрийларга ҳурмат-эҳтиром кўрсатиш 9-май “Хотира ва қадрлаш куни”нинг ўзига хос мазмунини ифода этади. Давлатимиз раҳбари томонидан ушбу санага муносиб тайёргарлик кўриш бўйича имзоланган қарорга кўра айни кунларда юртимизнинг барча ҳудудларида муҳтарам фахрийларимиз эъзозланиб, уларнинг унутилмас қаҳрамонликларини эътироф этилмоқда.

Чилонзор туманида истиқомат қилувчи Соколова Тамара Михайловнанинг маҳалласи бугун айём шукуҳига билан тўлган. Намунали оркестр мусиқаси, болажонларнинг қизиқувчан нигоҳлари, меҳмонларнинг давомий қадамидан онахоннинг кайфияти ҳар қачонгидан ҳам юқори.

Ички ишлар вазири генерал-лейтенант Азиз Ташпулатов Тамара Михайловнанинг хонадонига ташриф буюриб, Президентимиз томонидан йўлланган табрикни ўқиб эшиттирди. Ленинград қамалини кўрган фахрийнинг нигоҳлари бугунги унутилмас лаҳзаларни, тинч-осуда замонларга шукроналикни ўзида мужассам этган. Онахонга давлатимиз раҳбарининг мукофотларини топширилиб, мустаҳкам саломатлик тиладилар. Чилонзорнинг сокин маҳалласида, жонажон қўшнилар билан қурилган суҳбатда ҳам энг кўп таъкидлангани тинчлик сўзи бўлди. Дарҳақиқат, унинг қадрини жаҳон уришини кўрганлар чин юракдан ҳис эта олади.

1940 йилда туғилган Дегтярова Мария Акимовна айни вақтда Чилонзор туманида истиқомат қилади. Унинг гўдаклиги ва болалиги конслагерда ўтганлиги боис уруш хотиралари мурғак қалбини қаттиқ жароҳатлаган. Ички ишлар вазирлиги раҳбарияти шу юрт ривожи учун меҳнат қилган Мария Акимовнага давлат раҳбарининг табриклари ва мукофотлари етказди.

Николай Петрунин асли Қозоғистонда туғилган. Иккинчи жаҳон уруши вақтида навқирон йигит бўлган ва фронтдаги жангларда мардонавор қатнашган қаҳрамонимизнинг кейинги ҳаёт йўли Тошкент билан боғланди. Сал кам юз ёшли фахрийга байрам табрикномаси ўқиб эшиттирилиб, совғалар топширилди.

Чилонзор туманидаги яна бир фариштали манзилда истиқомат қилувчи Анна Каримованинг хонадонида бугун унинг оила аъзолари ва яқинлари жам бўлган. Чинакам урушни ўз кўзлари билан кўрган, унда иштирок этган бу қаҳрамон аёлнинг нигоҳида ҳам худди бошқалар каби, камтарин ҳаёт, меҳнатга ҳамоҳанг ўтган умр йўли ва бугунидан миннатдорлик туйғуларининг ифодасини кўриш мумкин.

Ички ишлар вазирлиги раҳбарияти ташриф буюрган хонадонда умргузаронлик қилаётган Камарова Мария Сергевена ҳам тинчликнинг қадрини барчамиздан кўра яхшироқ англайди, юрак-юракдан ҳис этади. У билан кечган самимий учрашувда, бугунги осойишта кунларга етиб келганидан бахтиёрлиги, унга берилаётган эътибордан кўнгли шод эканлигини айтиб, меҳмонларга миннатдорлик билдирди.

Уруш тақдирида ўчмас из қолдирган Спивак Наталья Григорьевна 1937 йилда дунёга келган. Ленинград қамалида яқинларидан айрилганида ҳали ёш қизалоқ бўлсада аллақачон тақдир уни улғайтириб бўлган эди. Онахоннинг хонадонига ташриф буюрган меҳмонлар унинг болалик ҳикояларини тинглаб, ўзига хос хулоса чиқаришди. Наталя Григорьевнага етказилган табрик ва совғалар, хонадон соҳибасига байрамона кайфият улашди.

Тўқсон етти ёшни қарши олган Надежда Кудризкая асли Ленинградда туғилиб ўсган. Қуюқ ўрмонлардаги уруш хотираларини эслашни истамасада, ўрнак учун, бугунги тинчликни қадрига етиш учун набираларига ҳикоя қилиб туради. Хонадонга ташриф буюрган меҳмонлар қаҳрамонимизнинг бошидан ўтказганларини тинглаб, унинг жасорати, меҳнат-шижоати учун бугунги кун авлодлари номидан миннатдорчилик билдиришди.

Конслагер қучоғида гўдаклиги ўтган, урушдан кейинги оғир-қийинчилик йилларида ёш боши билан оғир меҳнат қилиб улғайган Алла Фунтикова ҳам давлатимиз раҳбарининг табриклари ва мукофотларини қабул қилиб олди. Улар билан суҳбатлашар экансиз бу шонли умр йўли аллақачон халқимизнинг бебаҳо маънавий бойлигига айланганлигини ҳис этасиз.

Бу каби тадбирлар ҳудудий ички ишлар органлари томонидан ҳам олиб борилиб, фахрийларимиз хонадонларига ташрифлар, уларга ҳурмат-эҳтиром кўрсатиш каби хайрли ишлар давом эттирилмоқда.