Ички ишлар органлари тизимида рақамлаштириш жараёнлари такомиллашиб бормоқда: рақамли ечимлар ва замонавий бошқарув усуллари жорий этилмоқда
2026-04-02 18:00:00 / Янгиликлар
Ички ишлар органлари тизимида амалга оширилаётган ислоҳотлар самарадорлигини ошириш, замонавий бошқарув усулларини жорий этиш ҳамда соҳада рақамлаштириш жараёнларини ўрганиш мақсадида Ички ишлар вазири генерал-лейтенант Азиз Ташпулатов томонидан Тошкент шаҳар ИИББ ҳузуридаги Қўриқлаш хизмати биносида масъулларнинг тақдимоти билан танишилди.
Тақдимотда Рақамли қўриқлаш платформасининг янги ташкил этилган модуллари намойиш этилди, шунингдек турли объектларни ва хонадонларни қўриқловга олиш, аҳолига қулайлик яратиш мақсадида соҳани рақамлаштириш ҳамда жамоат хавфсизлигини ишончли муҳофаза қилиш борасидаги чора-тадбирлар кўриб ўтилди.
Шу билан бирга, аҳоли кўп тўпланадиган жойларда қўриқлаш хизмати турларини тарғиб этиш мақсадида ташкил этилган “Security Office” хизмат кўрсатиш офиси фаолияти тақдимоти ўтказилди. Офисда аҳолининг хизмат турларидан кенг маълумот олишлари имконияти яратилган бўлиб, бу орқали хизмат кўрсатиш кўламини кенгайтириш имконияти яратилди.
Тадбирда ички ишлар органларида рақамлаштириш жараёнлари ўрганилди. Жумладан тизимда жорий этилган ахборот тизимлари, аҳолига хизмат кўрсатишда инсон омилини камайтиришга қаратилган дастурий таъминот, видеокузатув тармоқлари, автоматлаштирилган назорат ва мониторинг платформалари амалда қандай ишлаётгани намойиш этилди.
Жараёнда, масъулларга рақамли технологияларни янада кенгайтириш, он-лайн хизматлар сонини ва хизмат самарадорлигини ошириш, номзодларни танлаш фаолиятини рақамлаштириш, ходимларнинг касбий тайёргарлиги, маънавий-ахлоқий қиёфаси ва уларни рағбатлантириш механизмлари юзасидан аниқ топшириқлар берилди.