Ўзбекистон Республикаси ички ишлар вазирининг биринчи ўринбосари — Жамоат хавфсизлиги департаменти бошлиғи генерал-майор Рустам Джураев хизмат сафари билан Бухоро вилоятига ташриф буюрди
2026-03-30 12:45:00 / Янгиликлар
Ташриф давомида вазирнинг биринчи ўринбосари туристик ҳудудларда жамоат хавфсизлигини таъминлаш чора-тадбирлари, жумладан замонавий технологияларни жорий этиш ва туристлар тўпланадиган жойларда ҳаракатни ташкил этиш ишлари билан танишди. Ходимларнинг меҳмонларга нисбатан хушмуомалалиги ва интизомга қатъий риоя этишига алоҳида эътибор қаратилди.
Ташриф дастури доирасида ички ишлар органларининг моддий-техника базасини ривожлантириш масалаларига устувор аҳамият берилди. Жумладан, департамент бошлиғи Бухоро вилояти ички ишлар бошқармаси учун барпо этилаётган маъмурий бино қурилиши ва таъмирлаш ишларининг бориши билан танишди. Жойида бажарилаётган ишлар суръати ва сифати, шунингдек пудратчи ташкилотлар фаолияти ўрганилди.
Шунингдек, шахсий таркибнинг хизмат ўташи учун замонавий ва қулай шароитлар яратиш, аҳолига давлат хизматларини кўрсатиш сифатини ошириш мақсадида илғор рақамли ечимларни жорий этиш ва фуқаролар мурожаатларини кўриб чиқиш жараёнларини оптималлаштириш масалалари кўриб чиқилди.
Шундан сўнг Рустам Джураев Бухоро шаҳри патруль-пост хизмати баталонига ташриф буюриб, шахсий таркибнинг хизмат ўташ ва дам олиш шароитлари билан танишди, жамоат тартибини таъминлаш, фуқаролар хавфсизлиги ва сутка давомида хизматни ташкил этиш масалалари бўйича мансабдор шахсларнинг ҳисоботларини тинглади.
Хизмат фаолияти самарадорлигини ошириш, замонавий техник воситалар билан жиҳозланганлик даражасини юксалтириш, шунингдек кўча жиноятчилигининг олдини олиш чораларини такомиллаштириш масалаларига алоҳида эътибор қаратилди.
Ташриф давомида ишчи гуруҳ Когон шаҳрида жойлашган махсус қабулхона ва реабилитация марказига ҳам ташриф буюриб, муассасанинг ҳолати, моддий-техника базаси, шунингдек у ерда сақланаётган шахсларни сақлаш шароитлари, овқатлантириш ва тиббий таъминот ташкил этилиши ҳар томонлама ўрганилди.
Ўрганишлар якуни бўйича шароитларни янада такомиллаштириш, хизмат интизоми ва ходимлар масъулиятини ошириш, шунингдек сақланаётган шахсларни ижтимоий мослашувига қаратилган реабилитация тадбирларини фаоллаштириш юзасидан аниқ топшириқлар берилди.
Ташриф якунида жамоат тартибини сақлаш, барқарорликни мустаҳкамлаш ва аҳоли манфаатлари йўлида хавфсиз муҳитни шакллантиришга қаратилган идоралараро ҳамкорликни янада кучайтириш ва саъй-ҳаракатларни мувофиқлаштириш зарурлиги таъкидланиб, тегишли топшириқлар ва амалий тавсиялар берилди.
ИИВ ЖХД Ахборот хизмати