Ички ишлар вазирлиги ҳамда унинг ҳудудий бўлинмалари томонидан ташкил этилган сайёр қабуллар давомида фуқароларнинг мурожаатлари батафсил ўрганилиб, мавжуд муаммоларни тизимли бартараф этишга қаратилган аниқ вазифалар белгиланмоқда
2026-03-30 08:00:00 / Янгиликлар
Юртбошимиз томонидан илгари сурилган муҳим йўналишлардан бири сифатида аҳоли билан очиқ, самарали ва доимий мулоқотни таъминлаш масаласи алоҳида эътиборга олинмоқда.
Шу мақсадда ички ишлар органлари томонидан фуқаролар билан бевосита алоқани кучайтириш, уларнинг мурожаат ва эҳтиёжларини чуқур таҳлил қилиш, келиб тушаётган ариза ва таклифларни амалдаги қонунларга мувофиқ ўз вақтида кўриб чиқиш ҳамда тегишли чораларни белгилаш бўйича изчил ишлар олиб борилмоқда.
Жорий йилнинг 29 март куни Ички ишлар вазири генерал-лейтенант Азиз Ташпулатов раҳбарлигида, масъул мутасаддилар иштирокида аҳоли учун навбатдаги сайёр қабул ташкил этилди. Қабул жараёнида аҳолига қулай шароит яратиш мақсадида, об-ҳаво ҳамда масофавий омиллар инобатга олинди. Хусусан, Тошкент шаҳри ва вилояти фуқаролари билан юзма-юз мулоқот ўтказилган бўлса, Қорақалпоғистон Республикаси ва бошқа ҳудудларда яшовчилар учун қабуллар видеоконференция орқали масофадан туриб ташкил этилди.
Ушбу тадбир давомида жами 521 та мурожаат қайд этилди. Уларнинг аксарияти фуқаролар ўртасидаги молиявий муносабатлар, йўл ҳаракати хавфсизлиги, суриштирув ва дастлабки тергов жараёнлари, шунингдек, кадрлар билан ишлаш масалаларига оид муаммоларни қамраб олди.
Келиб тушган мурожаатларнинг 250 таси, яъни 48 фоизи қонунчилик асосида жойида ижобий ҳал қилинди. Қолган 271 та мурожаат бўйича эса қўшимча ўрганиш талаб этилгани сабабли, улар назоратга олиниб, масъул идоралар ҳамкорлигида кўриб чиқиш учун тегишли топшириқлар берилди.
Шу билан бирга, Қорақалпоғистон Республикаси, Тошкент шаҳри ва вилояти, шунингдек, бошқа ҳудудлардаги ички ишлар органлари раҳбарлари томонидан ўтказилган қабулларда жами 475 та мурожаат қабул қилинди. Уларнинг 185 таси, яъни 39 фоизи жойидаёқ ижобий ечим топган бўлса, 290 таси қўшимча текширув асосида кўриб чиқиш учун йўналтирилди.
Сайёр қабуллар давомида аҳолини ташвишга солаётган масалалар, ҳуқуқий муаммолар ва уларни бартараф этиш йўллари атрофлича муҳокама қилиниб, фуқароларга тегишли тушунтиришлар берилди.
Ушбу тадбирлар тизимли равишда мамлакатимизнинг барча ҳудудларида давом эттирилмоқда.