Республика идоралараро мувофиқлаштириш штаби томонидан Сирдарё вилоятида Президент қарорлари ижроси юзасидан тизимли ўрганишлар олиб борилмоқда
2026-03-29 09:00:00 / Янгиликлар
Сирдарё вилоятида Ўзбекистон Республикаси Президентининг 2026 йил 5 январдаги ПҚ–1 ва ПҚ–2-сон қарорлари ижросини таъминлаш юзасидан Республика идоралараро мувофиқлаштириш штаби томонидан кенг кўламли ўрганишлар ва муҳокамалар ўтказилмоқда.
Бош прокурорнинг биринчи ўринбосари Б.Валиев ва вилоят ҳокими Э.Турдимов раҳбарлигида ўтказилган йиғилишда мутасадди вазирлик ва идоралар, ҳуқуқ-тартибот органлари ҳамда тегишли ташкилотлар вакиллари иштирок этди.
Унда маҳаллаларда хавфсиз муҳит яратиш, жиноятчиликнинг барвақт профилактикасини кучайтириш ва манзилли ишлаш тизимини самарали жорий этиш масалалари танқидий муҳокама қилинди.
Ўрганишлар доирасида ишчи гуруҳлар жойларда, хусусан Гулистон шаҳри маҳаллаларида бўлиб, криминоген вазиятни барқарорлаштириш, аҳоли билан манзилли ишлаш ва профилактик тадбирларни кучайтириш юзасидан амалга оширилаётган ишлар билан танишди.
«Баҳор» маҳалласида «маҳалла еттилиги» билан мулоқот ўтказилиб, низоли оилалар билан ишлаш, эрта турмушнинг олдини олиш ҳамда «Ёш оила қурувчилар мактаби» фаолияти алоҳида кўриб чиқилди.
Шунингдек, тиббиёт муассасаларида руҳий касалликка чалинган, спиртли ичимлик ёки гиёҳванд моддаларга мойил шахслар билан олиб борилаётган профилактик ишлар таҳлил қилиниб, уларни даволаш ва реабилитация қилишни кучайтириш бўйича топшириқлар берилди.
Бундан ташқари, Гулистон шаҳрида идоралараро тезкор штаб фаолияти ўрганилиб, «Чилонзор тажрибаси» асосида маҳаллаларда хавфсиз муҳит яратиш, ҳуқуқбузарликларнинг олдини олиш, профилактик ҳисобдаги шахслар билан манзилли ишлаш ҳамда хотин-қизлар ва ёшларни қўллаб-қувватлаш чоралари муҳокама қилинди.
Айниқса, ижтимоий кўмакка муҳтож оилалар билан тизимли ишлаш, бандликни таъминлаш ва ҳар бир шахс билан якка тартибда ишлашни ташкил этиш муҳимлиги таъкидланди.
Йиғилиш якунида масъул раҳбарларнинг ҳисоботлари эшитилиб, мавжуд камчиликларни бартараф этиш ва белгиланган вазифаларни самарали амалга ошириш бўйича аниқ қарорлар қабул қилинди.
Шунингдек, жамоатчилик фаоллигини ошириш мақсадида Гулистон давлат университетидаги «Қалқон» гуруҳи аъзолари рағбатлантирилиб, уларга эсдалик совғалари топширилди.
Республика идоралараро мувофиқлаштириш штабининг Сирдарё вилоятидаги ўрганишлари давом этмоқда.
Сирдарё вилояти ИИБ Ахборот хизмати