Ички ишлар вазири генерал-лейтенант Азиз Ташпулатов томонидан Тошкент вилоятида жазони ижро этиш муассасалари фаолияти ўрганилиб, маҳкумларни тарбиялаш ва касбга йўналтиришдаги ислоҳотлар ва натижалар таҳлил қилинди
2026-03-25 20:10:00 / Янгиликлар
Ички ишлар вазири генерал-лейтенант Азиз Ташпулатов томонидан Чирчиқ шаҳрида жойлашган 13-сон ҳамда Бўстонлиқ туманидаги 7-сон жазони ижро этиш колонияларининг фаолияти, муассасаларда яратилган шарт-шароитлар, маҳкумларни тарбиялаш ва уларни жамиятга қайта мослаштириш борасида амалга оширилаётган ишлар самарадорлигини ўрганилди.
Ўрганишлар давомида, Давлат раҳбарининг ташаббуслари билан маҳкумларга яратилган шароитлардан унумли фойдаланиб, уларни ахлоқан тузатиш, касб-ҳунарга ўргатиш ҳамда таълим олиш имкониятларини кенгайтириш ва фойдали меҳнатга жалб этиш борасидаги ишларга алоҳида эътибор қаратилди.
Жазони ижро этиш муассасалардаги тиббиёт ва реабилитация бўлинмалари, маҳкумлар учун узоқ ва қисқа муддатли учрашув хоналари, ихтисослаштирилган мактаб филиаллари, маънавият ва маърифат марказлари, ошхона ва ётоқхоналар фаолияти билан танишилди. Бу ерда маҳкумларнинг соғлиги, таълими ва маънавий тарбиясига қаратилган ишлар тизимли равишда йўлга қўйилгани қайд этилди.
Муассасалардаги ишлаб чиқариш корхонаси цехлари фаолияти ҳамда маҳкумларни касбга ўргатишга қаратилган “Мономарказ”лар фаолияти ҳам алоҳида ўрганилиб, бу йўналишни янада ривожлантириш зарурлиги таъкидланди.
Тадбир жараёнида, Ўзбекистон Республикаси Президентининг ёшларни тарбиясига эътиборни кучайтиришга қаратилган топшириқлари ижроси сифатида, Ички ишлар вазири томонидан тегишли масъуллар иштирокида жазо муддатини ўтаётган ёш маҳкумлар билан очиқ мулоқот ўтказилди.
Унда ҳар бир маҳкум давлат томонидан яратилган имкониятлардан унумли фойдаланиб, ички тартиб-қоидаларга қатъий риоя этган ҳолда, келажакда жамиятга соғлом фикрли, касб-ҳунарли ва ҳалол меҳнат орқали ҳаёт кечирадиган шахс сифатида қайтиши лозимлиги алоҳида таъкидланди. Ёшлар билан савол-жавоб ўтказилиб, таклиф ва мулоҳазалари тингланди, мурожаатлари қабул қилинди.
Шунингдек, муассасалардаги мактаб бинолари, хорижий тиллар ўқитиладиган синфхоналар, кутубхона, психолог хизматлари ҳамда “Медиа тарғибот” хоналари билан танишилиб, ушбу соҳаларни янада такомиллаштириш юзасидан тегишли топшириқлар берилди.
Ташриф якунида муассаса раҳбарларига шахсий таркиб билан тарбиявий ишларни самарали ташкил этиш, ходимларнинг хизмат фаолиятини мунтазам назорат қилиш ва уларнинг муаммоларини ҳал этишда амалий ёрдам кўрсатиш бўйича кўрсатмалар берилди.
Бу каби ўрганишлар бошқа минтақаларда ҳам давом этади.