Жорий йилнинг 13 март куни Тошкент шаҳрида жамоат хавфсизлигини мустаҳкамлаш, ҳуқуқбузарликларнинг олдини олиш ва аҳоли учун хавфсиз ҳамда барқарор муҳитни таъминлашга қаратилган муҳим йиғилиш бўлиб ўтди
2026-03-14 12:00:00 / Янгиликлар
Тадбирда Ички ишлар вазири генерал-лейтенант Азиз Ташпулатов ва Тошкент шаҳар ҳокими Шавкат Умурзаков иштирокида, Вазирлик соҳавий хизматлари ҳамда Тошкент шаҳар Ички ишлар бош бошқармаси ва бошқа ҳуқуқни муҳофаза қилувчи органлар масъул раҳбарлари қатнашдилар.
Йиғилиш давомида Ўзбекистон Республикаси Президентининг 2026 йилда Тошкент шаҳрида хавфсиз муҳитни шакллантириш ва жамоат хавфсизлигини самарали таъминлаш бўйича намунали амалиётни яратишга қаратилган чора-тадбирлар тўғрисидаги қарори ижросини таъминлаш масалалари атрофлича муҳокама қилинди. Шунингдек, мазкур қарор доирасида амалга оширилаётган ишлар, натижалар ҳамда мавжуд муаммолар таҳлил қилиниб, келгусида амалга оширилиши лозим бўлган устувор вазифалар белгилаб олинди.
Таъкидланганидек, пойтахтда жамоат хавфсизлигини таъминлаш, аҳоли тинчлиги ва осойишталигини сақлаш давлат сиёсатининг муҳим йўналишларидан бири ҳисобланади. Шу боис, ҳуқуқбузарликларнинг олдини олиш, жиноятчиликка қарши курашиш ва профилактика ишларини янги босқичга олиб чиқиш мақсадида ички ишлар органлари, маҳаллий ҳокимликлар ҳамда тегишли ташкилотлар ўртасидаги ҳамкорликни янада кучайтириш, жойлардаги мавжуд ҳолат таҳлил қилиниб, ҳар бир туман ва маҳалла кесимида хавфсизликни таъминлаш, ҳуқуқбузарликларнинг сабаб ва омилларини бартараф этиш бўйича аниқ вазифалар белгилаб берилди.
Шунингдек, замонавий ахборот-коммуникация технологияларидан кенг фойдаланган ҳолда жамоат хавфсизлигини таъминлаш тизимини такомиллаштириш, видеокузатув тизимларини кенгайтириш, тезкор хизматларнинг ўзаро ҳамкорлигини мустаҳкамлаш зарурлиги таъкидланди.
Мутасаддилар томонидан аҳоли мурожаатларини ўз вақтида кўриб чиқиш, фуқароларнинг ҳуқуқ ва манфаатларини ҳимоя қилиш, жамоат тартибини таъминлаш борасида масъул идораларнинг фаолиятини янада кучайтириш зарурлиги қайд этилди.
Йиғилишда яқинлашиб келаётган муборак Рамазон ҳайити ҳамда Наврўз умумхалқ байрами муносабати билан ўтказиладиган оммавий тадбирлар даврида жамоат хавфсизлигини таъминлаш, фуқаролар тинчлиги ва осойишталигини сақлаш масалаларига алоҳида эътибор қаратилди.
Хусусан, байрам кунлари аҳоли гавжум бўладиган жойларда ва диний маросимлар ташкил этиладиган масканларда хавфсизликни кучайтириш, фуқаролар тинчлиги ва осойишталигини сақлаш, турли нохуш ҳолатларнинг олдини олиш бўйича тегишли идоралар фаолиятини янада самарали ташкил этиш зарурлиги таъкидланди.
Шунингдек, оммавий тадбирлар ўтказиладиган ҳудудларда жамоат тартибини таъминлаш, профилактик чора-тадбирларни кучайтириш ҳамда тезкор хизматлар ўртасидаги ҳамкорликни мустаҳкамлаш бўйича аниқ вазифалар белгилаб берилди.
Йиғилиш якунида белгиланган вазифаларни ўз вақтида ва сифатли амалга ошириш, масъул ташкилотлар фаолиятини мувофиқлаштириш ҳамда пойтахтда хавфсиз ва барқарор муҳитни шакллантириш борасида аниқ топшириқлар берилди.