Ички ишлар вазирлигида «Юрт ободлиги, аввало маҳалладан бошланади!» шиори остида хайрия ҳашари ўтказилди
2026-03-13 12:30:00 / Янгиликлар
Юртимизда ҳар йили меҳр-оқибат ва ҳамжиҳатликни мустаҳкамловчи Наврўз умумхалқ байрами арафасида ободонлаштириш ва кўкаламзорлаштириш ишлари кенг кўламда олиб борилади. Ана шу эзгу анъаналар доирасида Ички ишлар вазирлиги Марказий аппаратида ҳам шахсий таркиб иштирокида «Юрт ободлиги, аввало маҳалладан бошланади!» шиори остида умумхалқ ҳашари ташкил этилди.
Мазкур ҳашарда вазирлик марказий аппарати раҳбар ва ходимлари фаол қатнашиб, ҳудудни янада обод ва кўркам қилишга ўз ҳиссаларини қўшдилар. Ҳашар давомида хизмат бинолари атрофини тартибга келтириш, ҳудудларни тозалаш, дарахт ва манзарали кўчатларга ишлов бериш, яшил ҳудудларни кенгайтириш ҳамда ободонлаштиришга қаратилган қатор ишлар амалга оширилди.
Шунингдек, ҳашар жараёнида ҳудуддаги йўлаклар ва яшил майдонлар тартибга келтирилиб, атроф-муҳит тозалиги таъминланди. Бу каби тадбирлар жамоада ҳамжиҳатлик ва бирдамлик муҳитини янада мустаҳкамлаш билан бирга, миллий қадриятларимизга ҳурмат туйғусини кучайтиради. Наврўз байрами арафасида ташкил этилаётган бундай хайрли тадбирлар нафақат ҳудудларни ободонлаштириш, балки табиатга меҳр-муҳаббат билан муносабатда бўлиш, покиза муҳитни асраб-авайлаш каби эзгу фазилатларни тарғиб этишда муҳим аҳамият касб этади.
Ички ишлар вазирлиги тизимида ҳам Наврўз байрами муносабати билан бундай ободонлаштириш ишлари изчил давом эттирилмоқда. Бу эса хизмат фаолияти билан бир қаторда жамоатчиликка намуна бўладиган муҳитни шакллантиришга хизмат қилади.