Ўзбекистон Республикаси Ички ишлар вазирлиги

Ички ишлар вазири генерал-лейтенант Азиз Ташпулатов томонидан соҳавий хизмат масъуллари, Пойтахт ИИББ раҳбарияти ҳамда Чилонзор тумани мутасаддилари иштирокида Тошкент шаҳрининг Чилонзор туманида хавфсиз муҳитни шакллантириш ва жамоат хавфсизлигини ишончли таъминлаш масалалари юзасидан танқидий йиғилиш ўтказилди.

Йиғилишда пойтахт ҳудудида жамоат хавфсизлигини таъминлаш, ҳуқуқбузарлик ва жиноятчиликнинг олдини олиш, аҳоли тинчлиги ва осойишталигини мустаҳкамлаш борасида амалга оширилаётган ишлар таҳлил қилинди. Шунингдек, Ўзбекистон Республикаси Президенти томонидан Тошкент шаҳрида ўтказилган танқидий селектор йиғилишида белгилаб берилган устувор вазифаларнинг ижроси ҳам атрофлича муҳокама этилди.

Хусусан, Чилонзор туманидаги маҳаллаларда жиноятчиликнинг олдини олиш, уларни жиноятдан ҳоли ҳудудга айлантириш, профилактика ишларини кучайтириш ва аҳоли билан мулоқотни янада фаоллаштириш масалаларига алоҳида эътибор қаратилди.

Йиғилишда йўл ҳаракати хавфсизлигини таъминлаш, транспорт воситалари ҳаракатини тартибга солиш, пиёдалар учун қулай ва хавфсиз шароит яратиш масалалари ҳам муҳокама қилинди. Шу билан бирга, бозорлар ва савдо мажмуалари атрофида тартиб-интизомни таъминлаш, ноқонуний савдо ҳолатларининг олдини олиш, аҳолига янада қулай шароитлар яратиш юзасидан аниқ топшириқлар берилди.

Тадбир давомида уюшган жиноятчилик, наркожиноятлар ҳамда кибержиноятчиликка қарши курашиш масалаларига ҳам алоҳида тўхталиб ўтилди. Бу каби жиноят турларининг олдини олишда замонавий ахборот технологияларидан кенг фойдаланиш, тезкор-қидирув тадбирларини кучайтириш ва профилактик чора-тадбирларни изчил амалга ошириш муҳим экани қайд этилди.

Шунингдек, пойтахтда жамоат хавфсизлигини таъминлаш бўйича шакллантирилган илғор тажриба — “пойтахт намунаси”ни Чилонзор туманида тўлиқ жорий этиш, бу орқали ҳудудда хавфсиз муҳитни янада мустаҳкамлаш ва аҳолининг ҳуқуқни муҳофаза қилувчи органларга бўлган ишончини ошириш зарурлиги таъкидланди.

Ўрганишлар давомида Чилонзор буюм бозорида “Рақамли ва хавфсиз бозор” тамойили асосида амалга оширилаётган чора-тадбирлар билан танишилди.

Хусусан, бозорга хизмат кўрсатувчи Ички ишлар бўлими биноси капитал таъмирланиб, яқин кунларда бошқарув маркази ташкил этилади. Бу орқали бозордаги тезкор вазият доимий назорат қилинади.

Шунингдек, бозорда “электрон биллинг тизими” ва сунъий интеллект камералари жорий этилмоқда. Ушбу тизим савдо расталари ва нархларни мониторинг қилиш, солиқдан бўйин товлаш ва ноқонуний йиғимларнинг олдини олишга хизмат қилади.

Тошкент шаҳри Чилонзор туманига туташ ҳудуд ҳисобланган Тошкент вилояти Зангиота тумани ИИБ фаолияти ўрганилди. Ўрганишлар давомида ҳудудда жамоат хавфсизлигини таъминлаш, ҳуқуқбузарлик ва жиноятчиликнинг олдини олиш борасида амалга оширилаётган ишлар танқидий таҳлил қилинди.

Хусусан, “Хавфсиз ва соғлом юрт” тезкор-профилактик тадбирлари доирасида олиб борилаётган чора-тадбирлар, профилактика ишларининг самарадорлиги ҳамда ички ишлар органлари ходимларининг хизмат фаолияти кўриб чиқилди.

Шунингдек, шахсий таркиб билан хизмат олди йўриқномаси ўтказилиб, жамоат хавфсизлигини таъминлаш, аҳоли осойишталигини сақлаш ва хизмат вазифаларини виждонан бажариш юзасидан тегишли кўрсатмалар берилди.

Шунингдек, жиноятчиликка қарши курашиш ва профилактика ишларини кучайтириш мақсадида оғир тоифага кирувчи “Зарқўрғон” маҳалласи ўрганилди. Таҳлил жараёнида маҳалладаги жиноят ўчоқлари атрофлича кўриб чиқилиб, мавжуд муаммолар ва уларни бартараф этиш бўйича зарур чора-тадбирлар белгилаб олинди.

Ўрганишлар давомида профилактика инспекторлари, қўриқлаш бўлинмалари ҳамда пост-патруль хизмати раҳбарларига маҳаллада жиноятчиликнинг олдини олиш, жамоат хавфсизлигини таъминлаш ва профилактика тадбирларини янада кучайтириш юзасидан тегишли топшириқлар берилди, профилактика ишларининг самарадорлигини ошириш, аҳоли билан мулоқотни кучайтириш ҳамда ҳудудда хавфсиз муҳитни таъминлаш масалаларига алоҳида эътибор қаратилди.

Чилонзор туманида масъул раҳбарларга белгиланган вазифалар ижросини самарали ташкил этиш, ҳар бир маҳаллада тинчлик ва хавфсизликни таъминлаш бўйича аниқ чора-тадбирлар кўриш юзасидан тегишли кўрсатмалар берилди. Таъкидланганидек, аҳоли осойишталиги ва жамоат хавфсизлигини таъминлаш борасидаги ишлар изчил давом эттирилади.