Ички ишлар вазирлиги ҳамда Бош прокуратура раҳбарияти томонидан Президент қарорлари ижроси юзасидан Сурхондарё вилоятида амалга оширилаётган ишлар ўрганилмоқда
2026-02-12 21:00:00 / Янгиликлар
Ўзбекистон Республикаси Ички ишлар вазирлиги ҳамда Бош прокуратура раҳбарияти томонидан Президентимизнинг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги ПҚ-1-сонли ҳамда “2026 йилда Республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ-2-сонли қарорлари ижроси юзасидан Сурхондарё вилоятида амалга оширилаётган ишлар ўрганилмоқда.
Жумладан, Ангор туманидаги “Шарқ гули” маҳалласида адлия органларига юклатилган вазифалар ижроси, низоли оилалар билан ишлаш, уларнинг ҳуқуқий муаммоларини бартараф этиш борасида амалга оширилаётган ишлар танқидий муҳокама қилинди. Низоли оилалар салмоғи юқори бўлган маҳаллаларда қайта хатлов ўтказиш, манзилли чора-тадбирлар белгилаш ҳамда тизимли ишларни кучайтириш юзасидан тегишли топшириқлар берилди.
Шунингдек, аҳоли ўртасида ҳуқуқий онг ва ҳуқуқий маданиятни юксалтириш, қонунийликни мустаҳкамлашга қаратилган ҳуқуқий тарғибот тадбирларини оммавий ахборот воситалари билан ҳамкорликда ташкил этиш, маҳалла раисларини низоларни медиация йўли билан ҳал этиш бўйича ўқитиш, сайёр қабуллар орқали фуқароларнинг мурожаатларини жойида ҳал этиш чораларини кучайтириш вазифалари белгилаб берилди.
Термиз шаҳридаги “Турон” маҳалласида эса хотин-қизлар томонидан содир этилиши мумкин бўлган ҳуқуқбузарлик ва жиноятларнинг барвақт олдини олиш бўйича амалга оширилаётган ишлар тақдимоти билан танишилди. Масъулларга низоли оилаларда яшовчи хотин-қизларнинг турмуш шароитидан доимий хабар олиб бориш, улар ўртасида ўз жонига суиқасд қилиш ҳолатларининг олдини олишга қаратилган психологик тадбирларни тизимли ташкил этиш ва назорат қилиш юзасидан кўрсатмалар берилди.
Бундан ташқари, пробация ҳисобида турган 18 нафар хотин-қизларнинг ижтимоий муаммоларини ўрганиш мақсадида маҳаллада сайёр қабул ҳамда бўш иш ўринлари ярмаркаси ташкил этилди. Уларнинг мурожаатлари тингланиб, мавжуд муаммоларни жойида ҳал этиш бўйича амалий чоралар кўрилди.
Ишчи гуруҳ томонидан ўрганиш ишлари давом этмоқда.