Тошкент шаҳридаги Олимпия шаҳарчасида Волейбол бўйича эркаклар ўртасида Ўзбекистон чемпионати — Олий лига баҳсларининг тантанали очилиш маросими бўлиб ўтди
2026-01-26 08:00:00 / Янгиликлар
Очилиш маросимида Осиё волейбол конфедерацияси президенти Рамон Сузара, Ўзбекистон Республикаси Ички ишлар вазири — Волейбол Федерацияси раиси Азиз Ташпулатов, Спорт вазири Адҳам Икромов ҳамда спорт жамоатчилиги иштирок этди.
Сўнгги йилларда давлатимиз раҳбари томонидан спортга берилаётган эътибор, айниқса олимпия ўйинлари таркибига киритилган жамоавий спорт турларини ривожлантириш борасида амалга оширилаётган ислоҳотларга тўхталиб, ўтди. Айниқса волейболнинг ёшлар орасида янада оммалашаётгани, бу борада халқаро спорт ташкилотларининг ҳам эътирофига сабаб бўлаётганлиги таъкидланди. Осиё волейбол конфедерацияси президенти Рамон Сузаранинг ушбу маросимдаги иштироки эса мусобақанинг нуфузи ва халқаро миқёсдаги аҳамиятини янада оширди.
Ушбу мусобақа 2026-йилги волейбол мавсумининг илк ва енг муҳим турнири сифатида алоҳида аҳамият касб етади. Мусобақа ўйинлари Олимпия шаҳарчаси жамоавий спорт турлари зали ҳамда “Жар” спорт-соғломлаштириш марказида ўтказилмоқда.
Жамоалар ўртасида қуръа ташлаш маросими ўтказилиб, 17 жамоа 4 гуруҳга бўлинган ҳолда 22-январдан расмий учрашувлар старт олди.
Жорий мавсумда илк маротаба волейбол бўйича Ўзбекистон чемпионати баҳслари “челленж” тизими ёрдамида ўтказилиб, турнир давомида ҳаққонийлик ва шаффофликни юксак савияда таъминланмоқда. Бу эса юртимизда волейболни янада ривожлантириш халқаро миқёсда янада яхши натижаларга эришишида катта қадам бўлди.
Волейбол бўйича Ўзбекистон чемпионати 29 январга қадар давом этади.