Ўзбекистон Республикаси Ички ишлар вазирлиги

Қорақалпоғистон Республикаси Ички ишлар вазирлигида тизим фаолиятининг ўтган йилдаги натижалари сарҳисоб қилиниб, келгуси йилга мўлжалланган устувор вазифалар муҳокама қилинди. Йиғилишда Ўзбекистон Республикаси Ички ишлар вазири, вазирликнинг соҳавий хизмат раҳбарлари, туман ва шаҳар ички ишлар органлари раҳбарлари ҳамда шахсий таркиб иштирок этди.

Тадбир давомида Давлат раҳбарининг республика маҳаллаларида хавфсиз муҳитни яратиш, ҳуқуқбузарликларнинг барвақт олдини олиш тизими самарадорлигини оширишга қаратилган қарорлари ижроси атрофлича таҳлил қилинди. Шунингдек, ушбу йўналишда манзилли ва тизимли ишлаш механизмларини жорий этиш бўйича қўшимча чора-тадбирлар белгилаб олинди.

2026 йил Ўзбекистонда «Маҳаллани ривожлантириш ва жамиятни юксалтириш йили» деб эълон қилинганини инобатга олган ҳолда, эришилган ижобий натижаларни янада мустаҳкамлаш, ички ишлар органларининг бошқа ҳуқуқни муҳофаза қилувчи идоралар ҳамда ҳамкор ташкилотлар билан ўзаро ҳамкорлигини кучайтириш бўйича аниқ манзилли режалар ишлаб чиқилди.

Йиғилишда 2026 йилни Ички ишлар вазирлиги тизимида “Ахборот технологиялари соҳасидаги жиноятларга қарши курашишни жадаллаштириш йили” сифатида белгилаш масаласи муҳокама қилиниб, кибержиноятчиликка қарши курашишда замонавий ахборот технологияларидан самарали фойдаланиш, соҳада малакали кадрлар тайёрлаш ҳамда раҳбарларнинг шахсий жавобгарлигини ошириш юзасидан аниқ вазифалар белгиланди.

Шунингдек, Ўзбекистон Республикасида гиёҳвандлик ва наркожиноятларга қарши курашиш бўйича 2024–2028 йилларга мўлжалланган миллий стратегия ижросини таъминлаш, гиёҳвандлик воситалари ва психотроп моддаларнинг ноқонуний айланмасига қарши курашиш, уюшган наркожиноятчилик фаолиятини фош этиш ҳамда ёшлар ўртасида профилактик тадбирларни кучайтириш масалалари атрофлича кўриб чиқилди.

Кун тартибида экстремизм ва терроризмга қарши курашиш соҳасида амалга оширилаётган ишлар самарадорлигини ошириш, радикал ғоялар тарқалишининг олдини олиш, аҳоли, айниқса ёшлар билан манзилли профилактик ишларни кучайтириш бўйича қўшимча чора-тадбирлар белгилаб олинди.

Шу билан бирга, ички ишлар органлари ходимларининг жисмоний тайёргарлиги ва жанговар шайлигини ошириш, хизмат интизомини мустаҳкамлаш, доимий машғулотлар ўтказиш ҳамда хизмат фаолиятида юксак тайёргарлик даражасини таъминлаш масалалари муҳокама этилди.

Йиғилишда аҳоли мурожаатлари билан ишлаш сифатини янада яхшилаш, фуқароларнинг мурожаатларини ўз вақтида ва холисона кўриб чиқиш, жойларга чиққан ҳолда муаммоларни ҳал этиш, мурожаатлар билан ишлашда очиқлик ва шаффофликни таъминлаш бўйича вазифалар белгилаб берилди.

Бундан ташқари, оғир ва ўта оғир жиноятларнинг ҳар бири юзасидан сабаб ва шарт-шароитларни чуқур таҳлил қилиш, жиноятчиликка олиб келаётган омилларни бартараф этиш, профилактика ишларини кучайтириш ҳамда масъул раҳбарларнинг жавобгарлигини ошириш масалалари юзасидан истиқболли вазифалар белгилаб олинди.