Фавқулодда вазиятлар вазирининг биринчи ўринбосари полковник С.Т.Зупаров раҳбарлигида Бухоро вилоятида ҳамкорликдаги қўмондонлик-штаб ўқув машқлари ўтказилмоқда
2026-10-28 20:50:00 / Янгиликлар
Машқларда бир нечта ўқув нуқталарида шартли фавқулодда вазиятлар юзага келганда фуқаро муҳофазасига масъул ташкилотлар ва тегишли хизматларнинг амалий ҳаракатлари синовдан ўтказилмоқда. Бунда фавқулодда вазиятларнинг олдини олиш, уларнинг оқибатларини тезкор бартараф этиш ҳамда аҳоли хавфсизлигини таъминлашга қаратилган чора-тадбирларнинг самарадорлигига алоҳида эътибор қаратилмоқда.
Ўқув машқлари доирасида тезкор хизматлар томонидан аҳолини хавфсиз ҳудудларга эвакуация қилиш, жабрланганларга биринчи тиббий ёрдам кўрсатиш, ёнғинларни ўчириш, қутқарув ишларини амалга ошириш ҳамда шартли фавқулодда вазият оқибатларини бартараф этиш бўйича амалий ҳаракатлар бажарилмоқда.
Шунингдек, масъул идора ва ташкилотларнинг ўзаро ҳамкорлиги, куч ва воситаларнинг шайлиги, бошқарув органларининг тезкор қарор қабул қилиш қобилияти ҳамда белгиланган вазифаларни мувофиқлаштирилган ҳолда бажариши баҳоланмоқда.
Мазкур машқлардан кўзланган асосий мақсад — фавқулодда вазиятларда бошқарув самарадорлигини ошириш, тегишли хизматларнинг ҳамкорлигини мустаҳкамлаш, қутқарув кучларининг амалий тайёргарлигини юксалтириш ҳамда аҳоли ҳаёти ва хавфсизлигини ишончли ҳимоя қилишдан иборат.