Фавқулодда вазиятларда тўғри ҳаракат қилишга ўргатувчи тарғибот материаллари тарқатилмоқда
2026-06-18 09:30:00 / Янгиликлар
Фавқулодда вазиятлар вазирининг 2026-йил 24-февралдаги 44-сон буйруғи ижросини таъминлаш мақсадида, жорий йилнинг 17-июн куни Самарқанд вилоятидаги Самарқанд давлат ветеринария медицинаси, чорвачилик ва биотехнологиялар университети ҳамда "Ипак йўли" туризм ва маданий мерос халқаро университетида семинар ташкил этилди.
Семинар давомида Фуқаро муҳофазаси институти томонидан ишлаб чиқилган зилзила ва бошқа фавқулодда вазиятларда тўғри ҳаракат қилиш бўйича буклет, плакат, журнал, флаер, китоб, услубий қўлланмалар ҳамда сурдо таржимон иштирокидаги видеоқўлланмаларни таълим муассасалари ва аҳоли ўртасида тарғиб этиш масалалари муҳокама қилинди.
Тадбирда Мактабгача ва мактаб таълими бошқармаси тасарруфидаги мактабгача таълим ташкилотлари, умумий ўрта ва ихтисослаштирилган таълим муассасалари, профессионал ва олий таълим муассасалари раҳбарлари, шунингдек, маҳалла фуқаролар йиғинлари раислари иштирок этди.
Семинар якунида иштирокчиларга фавқулодда вазиятларда тўғри ҳаракат қилиш кўникмаларини оширишга хизмат қилувчи 890 дона турли мавзулардаги буклет, плакат, журнал, флаер, китоб ва услубий қўлланмалар тарқатилди.
Мазкур тарғибот тадбирлари республиканинг барча ҳудудларида изчил давом эттирилмоқда.