Бухоро вилояти Фавқулодда вазиятлар бошқармасида ҳарбий хизматчилар ва уларнинг оила аъзолари иштирокида бир қатор маънавий-маърифий тадбирлар ташкил этилди
2026-06-13 14:00:00 / Янгиликлар
Дастлаб, “Оилага шарқона садоқат” мавзусидаги учрашувда оилавий қадриятлар, ҳарбий хизматчи оиласининг жамиятдаги ўрни, ҳарбийнинг турмуш ўртоғи бўлишнинг масъулияти ва машаққати ҳамда Тўмарис издоши бўлган матонатли аёлларнинг фидойилиги ҳақида сўз юритилди. Уларнинг тиббий саломатлигини таъминлаш мақсадида тиббий кўриклар, психологик тренинглар ва спорт ўйинлари ташкил этилди.
Шунингдек, ҳарбий хизматчилар ва уларнинг оила аъзолари иштирокида ташкил этилган “Китобхон оила” кўрик-танловида мутолаа маданияти, оилаларда китобхонлик анъаналарини ривожлантириш ва маънавий муҳитни мустаҳкамлаш масалаларига алоҳида эътибор қаратилди. Танлов якунида ғолиблар муносиб тақдирланди.
Тадбирлар доирасида ФВБ тизимида хизмат бурчини адо этиш чоғида ҳалок бўлган ходимларнинг оила аъзолари ҳолидан ҳам хабар олиниб, уларга маънавий далда ва эътибор кўрсатилди. Марҳум қутқарувчиларнинг ёрқин хотираси эҳтиром билан ёд этилиб, уларнинг оила аъзоларини ҳар томонлама қўллаб-қувватлаш доимий эътиборда экани таъкидланди.
Мазкур тадбирлар оилавий қадриятларни асраб-авайлаш ва мустаҳкамлаш, китобхонлик маданиятини оммалаштириш ҳамда фидокорона хизмат қилаётган ходимлар оилаларига эътибор ва ғамхўрлик кўрсатиш орқали жамиятда юксак маънавий муҳитни шакллантиришга хизмат қилади.