Фавқулодда вазиятлар вазири ўринбосари томонидан Сирдарё вилоятида ёз мавсумида юзага келиши мумкин бўлган фавқулодда вазиятларнинг олдини олиш бўйича амалга оширилган тадбирлар юзасидан ўрганиш ишлари олиб борилди.
2026-06-04 10:30:00 / Янгиликлар
Шундан сўнг, Сайҳунобод ва Сирдарё туманларидаги дон қабул қилиш, сақлаш ва қайта ишлаш корхоналарнинг ёнғин хавфсизлиги ҳолати, мавжуд ёнғинга қарши ҳимоя воситаларининг созлиги, эвакуация йўлаклари ҳолати ҳамда фавқулодда вазиятларнинг олдини олишга қаратилган қўшимча чора-тадбирларнинг ижроси ўрганилди.
Куннинг иккинчи қисмида фермер хўжаликлари далаларида мавжуд мембрана қопламали сув ҳавзаларида хавфсизликни таъминлаш бўйича амалга оширилган чора-тадбирлар ўрганилиб, мазкур сув ҳавзаларида фуқаролар, айниқса болалар ва ўсмирларнинг хавфсизлигини таъминлашга қаратилган профилактик тадбирларнинг ҳолати кўздан кечирилди. Хусусан, сув ҳавзалари атрофида ўрнатилган огоҳлантирувчи белгилар, ҳимоя тўсиқлари, нажот арқонлари ҳамда хавфсизлик талабларига риоя этилиши юзасидан назорат амалга оширилди.
Шунингдек, ФВБ ва масъул ташкилотлар вакилларига ёз мавсумида юзага келиши мумкин бўлган бахтсиз ҳодисаларнинг олдини олиш, хавфсизлик чораларини янада кучайтириш ҳамда аҳоли ўртасида тарғибот-ташвиқот ишларини мунтазам олиб бориш юзасидан тегишли кўрсатмалар берилди.