Фавқулодда вазиятлар вазири генерал-майор А.Икрамов ҳамда Бирлашган Миллатлар Ташкилотининг болалар жамғармаси (UNICEF)нинг Ўзбекистон Республикасидаги вакили Реҳина Мария Кастижио ўртасида учрашув бўлиб ўтди
2026-04-14 19:10:00 / Янгиликлар
Бугун, Фуқаро муҳофазаси институтида ташкил этилган учрашувда томонлар ўзаро ҳамкорликнинг устувор йўналишларини муҳокама қилдилар. Унда фавқулодда вазиятларнинг олдини олиш, аҳолининг, айниқса болалар ва ёшларнинг хавфсизлигини таъминлаш борасидаги ҳамкорликни янада кенгайтириш масалаларига алоҳида эътибор қаратилди.
Шунингдек, учрашув якунида икки томонлама стратегик ҳамкорликни мустаҳкамловчи Меморандум имзоланди.
Мазкур Меморандумнинг асосий мақсади — табиий офатлар хавфини камайтириш, иқлим ўзгариши ҳамда турли фавқулодда вазиятларнинг болалар ва ёшлар ҳаёти ва соғлиғига салбий таъсирини минималлаштиришдан иборатдир.
Бундан ташқари, томонлар болалар ва ёшларни таълим, амалий машғулотлар ҳамда махсус тайёргарлик дастурлари орқали фаол жалб этиш, улар орасида хавфсизлик маданиятини шакллантириш ва кенг тарғиб қилиш бўйича ҳамкорликни ривожлантиришга келишиб олдилар. Ушбу ҳамкорлик келгусида фавқулодда вазиятларга тайёр, билимли ва масъулиятли ёш авлодни тарбиялашда муҳим аҳамият касб этади.
Учрашув давомида институтда меҳмонлар учун саёҳат ташкил этилиб, унда зилзила тарихи музейи, зилзила симулятори, ёнғин хавфсизлиги ва биринчи ёрдам тренажёрлари ҳамда бошқа фавқулодда вазиятлар шароитида тўғри ҳаракат қилишга тайёрловчи 3Д ўлчамдаги виртуал дастурли интерактив хоналар батафсил таништирилди.