Наманган вилояти Фавқулодда вазиятлар бошқармасида оммавий ахборот воситалари вакиллари, журналист ва блогерлар учун матбуот анжумани ўтказилди
2026-03-31 18:35:00 / Янгиликлар
Иштирокчиларга 2026 йил 1-чорак давомида ҳудудда ўта хавфли юқумли касалликлар қайд этилмаганлиги, шунингдек, чегаралардаги санитария-карантин пунктлари орқали кириб келаётган барча фуқаролар тиббий кўрикдан ўтказилиб, касалликларнинг кириб келиши олди олинганлиги айтиб ўтилди. Аҳоли ўртасида профилактик тарғибот ишлари олиб борилиб, дезинфекция, дезинсекция ва дератизация тадбирлари амалга оширилди. Чорва моллари ўртасида куйдирги ва қутуриш касалликларига қарши эмлаш ишлари ташкил этилди.
Сел-тошқин ва кўчки ҳодисаларининг олдини олиш ҳамда аҳоли хавфсизлигини таъминлаш борасида дарё ва каналларда тозалаш, қирғоқларни мустаҳкамлаш ишлари олиб борилди. Шунингдек, ҳудудларда назорат кучайтирилиб, ташкил этилган назорат-кузатув постлари ва ҳудудий штаблар орқали 24 соатлик мониторинг йўлга қўйилди.
Амалга оширилаётган барча тадбирларнинг асосий мақсади — аҳоли хавфсизлигини таъминлаш ва фавқулодда вазиятларнинг олдини олишга қаратилган.
Тадбир якунида оммавий ахборот воситалари вакиллари, журналист ва блогерлар томонидан берилган саволларга мутахассислар томонидан батафсил жавоблар берилди.