Bu sana 1992-yilda BMTning Rio-de-Janeyrodagi konferensiyasida belgilangan. Maqsad ekologik mas’uliyatni oshirish, tabiatga g‘amxo‘rlik qilish madaniyatini rivojlantirish va aholi o‘rtasida barqaror turmush tarzini targ‘ib qilishdan iborat.

O‘zbekistonda yosh avlodga ekologik ta’lim va tarbiya berishga alohida e’tibor qaratilmoqda. Ekologiya, atrof-muhitni muhofaza qilish va iqlim o‘zgarishi vazirligi Maktabgacha va maktab ta’limi vazirligi bilan hamkorlikda katta ishlarni amalga oshirmoqda: 10 mingdan ortiq maktabda 32 mingga yaqin ekologiya-biologiya to‘garaklari tashkil etilgan bo‘lib, ularda 470 mingdan ortiq maktab o‘quvchilari qatnashmoqda. Shuningdek, 5 ming 200 ta maktabda “ekologik burchaklar” tashkil etilib, o‘rta maxsus, kasb-hunar ta’limi muassasalarida 132 soatlik ekologik savodxonlik darslari yo‘lga qo‘yildi.

"Green University" — Markaziy Osiyo atrof-muhit va iqlim o‘zgarishini o‘rganish universitetining tashkil etilishi muhim qadam bo‘ldi. U ilmiy institutlar, texnikumlar, maktablar va malaka oshirish markazlarini birlashtirib, hududda malakali kadrlar tayyorlash va ekologik muammolarning ilmiy yechimini topish uchun mustahkam zamin yaratmoqda.

Ekologik ta’limni rivojlantirish nafaqat kelajakka qo‘yilgan sarmoya, balki inson va tabiat uyg‘unligining eng muhim shartidir. Bugun sayyoramizga g'amxo'rlik qilish orqali biz yashil va barqaror kelajakka zamin yaratamiz.